07 июля 2017 г.
Июлĕн 4-мĕшĕнче районта ĕçлĕ визитпа Чăваш Республикин ял хуçалăх министрĕ Сергей Артамонов пулнă. Сергей Геннадьевич "Слава картофелю" агрофирмăри ĕçсем мĕнле пынипе кăсăкланнă.
Асăннă хуçалăх çĕр улми тухăçне ỹстерес тата пахалăхлă вăрлăх çитĕнтерес енĕпе хастар ĕçлет. Сăмахран, агрофирма паянхи куна çĕрулмин 20 ытла вăрлăхне тĕпчет, ăна еплерех аван çитĕнтерме май пуррипе кăсăкланать. Унпа пĕрлех юлашки çулсенче ĕçе кĕртнĕ çĕнĕлĕхсенчен пĕри вăл - çĕрулми тĕмĕсене пробиркăсенче çитĕнтернĕ хыççăн вĕсене ятарлă теплицăсене лартса ỹстерни. Теплицăсенче çитĕнтернĕ вăрлăх тĕрлĕ вирус инфекцийĕсене парăнмасть. Çавна май агрофирма вăрлăхлăх çĕрулми çитĕнтерме çур гектар çĕр çинче 24 теплица вырнаçтарнă. Шăпах Сергей Артамонов "иккĕмĕш çăкăр" тĕммисем теплицăсенче епле çитĕннипе паллашрĕ. Кăçал 0,42 гектар çĕр çинче лартнă пĕрремĕш сыпăкри вăрлăхран малашне супер-супер элита çĕрулми вăрлăхĕ туса илĕç.
Агрофирма ертỹçи Хасиятулла Идиатуллин пĕлтернĕ тăрăх, çитес вăхăтра хуçалăхра ятарлă лаборатори хута каймалла. Унта çĕрулми хунавĕсене вăй илтерес енĕпе ĕçлеме планлаççĕ. Çĕнĕ йышши технологисене тĕпе хурса проектсене ĕçе кĕртме патшалăх субсиди уйăрни, пĕлтерĕшлĕ пулăшу кỹни ĕçлеме хавхалантарать те.
Агрофирмăра тăрăшакансем пурнăç уттинчен юлмасăр аталанаççĕ, çĕнĕ инвестици проекчĕсене ĕçе кĕртеççĕ, çĕрулмин тухăçне çулсерен ỹстерсе пыраççĕ.
Михаил ИГНАТЬЕВ,
Чăваш Республикин Пуçлăхĕ:
"Вăрлăхлăх çĕрулми туса илмелли никĕсри хăйнеевĕр центр туса хумалла, ăна йĕркелени импорта пăхăнассине чакарма тата республикăри ял хуçалăх таварĕсем туса илекенсене те, килти хуçалăхсене те лартмалли вăрлăхпа тивĕçтерме май туса парать".
ЧР Патшалăх Канашне янă Çыруран.
А.ЕФРЕМОВА.
Источник: "Каçал Ен"