07 июля 2017 г.
Комсомольскинчи почта çыхăну уйрăмĕнчи почтальонсем пĕринчен тепри хастар. Тăхăр почтальон таврари 9 яла хаçат-журналпа, çырусемпе вăхăтра тивĕçтерет.
Акă, Дубовка, Киров, Васильевка, Çĕнĕ Каçал ялĕсен çыннисене хаçат-журналпа тата ытти почта çыхăнăвĕн çăмăллăхĕсемпе Ольга Павлова почтальон тивĕçтерет. Тăрăшуллă почтальон кунсерен 10 километр ытла çула парăнтарать. Ольга Валерьевна 2017 çулхи иккĕмĕш çур çула хаçат-журнал çырăнтармалли тапхăра аван вĕçленĕ. Апла пулин те вăл ял çыннисем тата та ытларах периодика изданийĕсене çырăнсан кăмăллăрах пулнине пĕлтерчĕ.
- Ялта пурăнакансем район хаçатне - "Каçал ене" - ытларах кăмăллаççĕ, ытти изданисене те айккине тĕкмеççĕ. Паянхи кун хаçат-журнал тусĕсем - аслăрах çулхисем, çамрăксем хыпар-хăнара ытларах Интернет урлă вуласа пĕлеççĕ пулас, - пĕлтерчĕ 17 çул ытла почтальон сумкине йăтакан Ольга Валерьевна.
Вăл коллективра чи нумай ĕçлекеннисенчен пĕри пулсассăн, Комсомольски ялĕнчи Завод тата Комсомольская урамсене çитекен Альфия Пардаева çак ĕçре 10 уйăх çеç тăрăшать. Апла пулин те вăл çак вăхăтра хаçат-журнал çырăнакансен йышне ỹстерме пултарнă çеç мар, палăртнă плана та вăхăтра тултарса пырать.
- Коллективри ĕçченсем чăннипех маттур. Ĕçе вăхăтра тата пахалăхлă пурнăçлаççĕ, плана тултарса ĕçлеççĕ. Чылай çул тăрăшаканнисем çамрăксене хăнăхтараççĕ. Пĕр-пĕринпе канашласан, пулăшсан ỹсĕмсем пулаççех, - терĕ пĕтĕмлетсе почта уйрăмĕн начальникĕ Маргарита Индюкова.
А.ЕФРЕМОВА.
Источник: "Каçал Ен"