04 июля 2017 г.
Çăкăрпа кондитер продукцийĕсем хатĕрлесе кăларакан завод умĕнчен иртсе пынă чухне сăмсана тутлă шăршă кăтăклать, таврара вара карамельпе ваниль тути хуçаланать. Ирхи ултă сехетре сарлака алăк йывăррăн уçăлнă хыççăн, умлăн-хыçлăн пысăк машинăсем çула тухаççĕ. Вĕсем республикăри тĕрлĕ районсемпе юнашар регионсене çул тытаççĕ.
Паянхи куна çăкăр пĕçерекен заводра пултаруллă та маттур аллă ытла ĕçчен тăрăшать. Вĕсенчен чылайăшĕ асăннă предприятире вуншар кăна мар, ытларах, вăтăршар çул ĕçлет. Ĕçченсем суту-илỹ вырăнĕсенчи сентресем çинчен хăйсен таварĕ ан татăлтăр тесе ырми-канми тар тăкаççĕ.
- Коллектив туслă пулнăран палăртнă тĕллевсене вăхăтра пурнăçлатпăр, плана та тултаратпăр. Предприяти - республикăри, районти чи лайăх ĕçлекеннисенчен пĕри. Тĕслĕхрен, Чăваш потребсоюз Канашĕ республикăри потребительсен кооперацийĕн предприятийĕсемпе организацийĕсем хушшинче ирттернĕ 2016 çулхи экономика конкурсĕнче "Хлебозавад" ООО çĕнтерỹçĕсен йышне кĕчĕ, эпир унта 3-мĕш вырăна тивĕçрĕмĕр, - предприяти ĕç-хĕлĕпе паллаштарчĕ тĕп бухгалтер Раиса Буланкова.
Ĕçченсем пирки сăмах пуçласан, вĕсем - пĕринчен тепри маттур. Тинрех ĕçлеме пуçланă çамрăксен вĕрентекенĕсем те, Гелине Ярхунова, Валентина Кошкина, ылтăн алăллă ĕçченсем. Вĕсем иккĕшĕ те асăннă предприятире чылай çул тăрăшаççĕ.
- Паллах, çакăн чухлĕ тĕрлĕрен тĕрлĕ продукцие хатĕрлеме пĕр смена çеç çителĕксĕр, çавăнпа та икĕ сменăпа ĕçлетпĕр. Пĕрремĕш сменăна килнисем кондитер продукцийĕсем хатĕрлеççĕ. Каçхи пилĕк сехетре вара иккĕмĕш смена пуçланать. Палăртнă вăхăтра ĕçе çитнисем ирхинене валли çăкăр пĕçереççĕ, - каласа пачĕ çăкăр пĕçерекенсен бригадирĕ Юлия Иванова. Çак маттур хĕрарăм та кунта вăтăр çула яхăн ĕçлет. Ĕçре пултаруллă пулнăшăн, унти çитĕнỹсемшĕн вăл пĕрре мар Тав хучĕсемпе Хисеп грамотисене тивĕçнĕ. Кăçал вара Чăваш Республикин Ял хуçалăх министерстви потребительсен кооперацийĕн предприятийĕсемпе организацийĕсем хушшинче ирттернĕ конкурса хутшăнса Юлия Григорьевна "Чи лайăх çăкăр пĕçерекен" ята çĕнсе илнĕ.
1968 çулта хута кайнă предприяти паянхи кун Чăваш Енри хуласемпе районсене, унсăр пуçне юнашар Тутарстан Республикинчи Кайпăç, Апас, Çĕпрел, Пăва районĕсенчи харпăрлăхри тата патшалăх лавккисене çăкăр-булкăпа, кондитер продукцийĕсемпе тивĕçтерсе тăрать. Сăмах май калас пулсан, кунти ĕçченсем 42 тĕрлĕ çăкăр-булка пĕçерме пĕлеççĕ. Кондитер продукцийĕн ассортименчĕ те кунран-кун ỹссех пырать. Кунти тăрăшуллă ĕçченсем пĕремĕк, рулет, кисель, шерпет, мармелад тата çавăн евĕр ыттисене те ăста янтăлаççĕ, тутар халăхĕсен йăли-йĕркине шута илсе вара чак-чак, хворост, баурсак кăларма йышăннă. Çак ĕç паянхи кун йăл илсе пырать те.
- Эпир туса кăларнă хатĕр продукцисене Хусан хулинче кашни шăматкун иртекен ял хуçалăх ярмăрккинчи выставкăра та туянма пулать. Краснодар хулинчи акционерсен хупă "Тандер" пĕрлешĕвĕпе килĕшỹ çырнă хыççăн хамăр таварсене "Магнит" супермаркетăн сентрисем çине те вырнаçтарма пуçларăмăр. Çапла вара, халĕ пирĕн паха продукципе Пĕтĕм Раççей сăйланать тесен те йăнăш пулмĕ, - терĕ çăкăр завочĕн директорĕ Физикат Абитов.
А.ИСАЕВА.
Источник: "Каçал Ен"