28 июня 2017 г.
Çуллахи кунсем ача-пăчасен сывлăхĕшĕн усăллă иртчĕр тесе Тукай Мишер вăтам шкулĕн вĕрентекенĕсем ырми-канми тăрăшаççĕ. Палăртнине пурнăçа кĕртес тĕллевпе асăннă шкул çумĕнче "Хĕвел" ача-пăча кану лагерĕ те ĕçленĕ.
Сăмахран, нумаях пулмасть лагерьте "Çуллахи лагерь - сывлăх территорийĕ" ятпа наркотиксене хирĕçле акци йĕркеленĕ. Унпа килĕшỹллĕн "Пирĕншĕн пуласлăх хаклă" темăпа калаçу ирттернĕ. Медицина ĕçченĕ И.Зайнуллина ачасене табак туртнин, эрех ĕçнин, наркотик тутаннин тата çилĕм шăршланин сиенĕсем çинчен тĕплĕн каласа панă.
- Усал йăлапа туслашманни хамăр сывлăхшăнах аван, - тенĕ лагере çỹрекенсем. Каярах "Фиксики" ушкăн викторинăна хутшăннă. Каламалла, çак викторина питĕ кăсăклă иртнĕ. Г.Шайхалова психолог педагог хатĕрленĕ "Çук - теме хăнăх" тренинг-урок пуриншĕн те усăллă пулнă.
Лагерьти кунсем хаваслă та сывлăхшăн усăллă иртнĕ. Ачасем нумай çĕннине пĕлнĕ, сывлăхне те çирĕплетнĕ.
(ХАМĂР ИНФ.).
Источник: "Каçал Ен"