20 июня 2017 г.
Раççейĕн пограничниксен çарĕсем яланах çĕршыв чиккисен сыхлăхĕшĕн яваплă пулнă, халĕ те çаплах. Çирĕммĕш ĕмĕрте асăннă çарсем 19 çар конфликтне хутшăннă, вĕсенчен саккăрăшĕнче - патшалăх тулашĕнче. Симĕс карттуслă салтаксем паянхи кун та Тăван çĕршыв чиккисенче паттăрлăхпа хăюлăх кăтартаççĕ. Чăваш Республикинче çуралса ỹснĕ арçынсем йышлăн пограничник пулма тивĕçнĕ, вĕсенчен чылайăшне пысăк наградăсемпе чысланă, Раççей Геройĕсем - виççĕн. Килес çул пограничниксен çарне туса хунăранпа 100 çул çитет.
Чикĕ хуралĕнче салтак тивĕçне пурнăçланисем чылай çул иртсен те туслăха çухатмаççĕ. Çак ĕçре вĕсене республикăри "Пограничниксен тăванлăхĕ" обществăлла организаци тата унăн районсенчи уйрăмĕсем те пулăшаççĕ. Пĕр-пĕринпе курнăçса калаçма, тĕрлĕ спорт тĕсĕсенче ăмăртма час-часах ăмăртусем йĕркелеççĕ. Акă, июнĕн 17-мĕшĕнче Комсомольскине Вăрнар, Йĕпреç, Канаш, Патăрьел, Хĕрлĕ Чутай, Муркаш районĕсенчен, Шупашкар хулинчен ветеран-пограничниксем килсе çитрĕç. Чикĕ хуралçисене халалласа район центрĕнче лартнă палăк умне чечексем хунă хыççăн Хĕр уçланкине куçрĕç. Унта волейбол выляссипе, штык çĕçĕ ывăтассипе, вырăнтан сикессипе, 100 метра чупассипе ăмăртусем пуçланчĕç. Хĕрỹ тупăшусенче спортăн чылай тĕсĕнче Комсомольскисем малти вырăнсене йышăнчĕç. Акă, волейбол вăййинче пирĕн команда виççĕмĕш (пĕрремĕш - Канаш хули, иккĕмĕш - Шупашкар), эстафетăра иккĕмĕш (çĕнтерỹçĕсем - Хĕрлĕ Чутайсем, виççĕмĕш вырăнта Патăрьелсем). Геннадий Филиппов вырăнтан сикессипе, 100 метра чупассипе 50 çулчченхисем хушшинче пĕрремĕш пулчĕ. Штык çĕçĕ ывăтассипе вара Леонид Киргизова çитекен пулмарĕ, чи нумай очко пуçтарса вăл çĕнтерỹçĕ ятне тивĕçрĕ. Иккĕмĕшпе виççĕмĕш вырăнсене Канашран килсе çитнĕ Ильдар Хабибуллинпа Александр Иванов пайларĕç.
Республикăри "Пограничниксен тăванлăхĕ" обществăлла организацин тата унăн районти уйрăмĕн председателĕсем Анатолий Шорниковпа Анатолий Терентьев çĕнтерỹçĕсене дипломсемпе тата медальсемпе наградăларĕç. Асăннă мероприятисене хатĕрленсе ирттерме пулăшнăшăн "Слава картофелю" агрофирмăн генеральнăй директорне Хасиятулла Идиатуллина, Комсомольски райпо совечĕн председательне Евгений Карпеева Тав хучĕсемпе чысларĕç.
Л.ШУРЯШКИНА.
Источник: "Каçал Ен"