19 мая 2017 г.
Юлашки вăхăтра телефонпа усă курса улталанă тĕслĕхсем йышланнине кура районти полици уйрăмĕ асăрхануллăрах пулма ыйтать. Телефон çыхăнăвĕпе усă курса сирĕн тăванăр е çывăх çыннăр ырă мар лару-тăрăва çакланнă тесе шăнкăравлаççĕ те укçа тỹлесен "ыйтăва татма" май пуррине калаççĕ, укçана еплерех куçармаллине (пĕр-пĕр номер çине) ăнлантараççĕ. Шăпах çак кунсенче Çĕнĕ Шупашкар хулинче пурăнакан 77 çулхи пенсионеркăна "шăннă пăр" çине лартса хăварнă. Вăл ултавçăсене 78 пин тенкĕ куçарса панă.
Преступниксем банк сотрудникĕ пек пулса карттăна блокировка тунă тесе шăнкăравлаççĕ, программа тĕрлĕ сăлтава пула ĕçлеме пăрахнине калаççĕ, банк терминĕсемпе усă курса шанăçа кĕреççĕ. Банк терминалĕ умне пырса пĕр-пĕр номер çине шăнкăравласа унпа калаçакан ăнлантарса пынă тăрăх карттăпа тĕрлĕ ĕçсем пурнăçлама ыйтаççĕ. Калаçнă хушăра ултавçă банк карттин уйрăм реквизичĕсене (пин-код...) пĕлет, унтан хăйне кирлĕ номер çине укçа куçарса илет. Кун пек тĕслĕхсем республикăра вун-вун пулнă пулин те, каллех ултавçăсен аллине лекнисем пур. Çак кунсенче çеç Йĕпреç районĕнче тата Шупашкар хулинче пурăнакансене суйнă, укçа-тенкĕсĕр хăварнă.
Хисеплĕ граждансем, асăрхануллă пулăр! Хăвăра улталама ан парăр. Тĕрлĕ тавар сĕнекенсене, социаллă ĕçченсем пек пыракансене ан ĕненĕр. Çỹлерех асăннă йышши тĕслĕхсенче тимлĕ пулăр. Укçа-тенкĕ куçарса париччен тăванăрсем патне шăнкăравлăр, банк сотрудникĕсемпе çыхăнăр! Иккĕленỹ çуратакан çынсем пирки тỹрех полицие 02 е 5-14-13 номерсемпе шăнкăравласа пĕлтерĕр.
А.АХМЕЕВ,
районти полици начальникĕ.
Источник: "Каçал Ен"