05 мая 2017 г.
Районти хуçалăхсенче ака ĕçĕсем вăй илсех пыраççĕ. Ма-йăн 4-мĕшĕ тĕлне пурĕ 2579 гектар çурхи тата пăрçа йышши культурăсем акнă. Ку енĕпе уйрăмах "Слава картофелю" агрофирма (392 гектар), "Дружба" ЯХПК (300 гектар), "Слава" ЯХПК (245 гектар), "Искра" колхоз (205 гектар), "Рассвет" ЯХПК (180 гектар), Хайртдиновăн фермер хуçалăхĕ (160 гектар), "Родина" фермер хуçалăхĕ (190 гектар) маттур ĕçлеççĕ. Унсăр пуçне "Комсомольские овощи" агрофирма 12 гектар кишĕр акнă. Кăçал агрофирмăра "Зефиро" тата "Сильвано" сортсене суйласа илнĕ. Унпа пĕрлех "Комсомольские овощире" тăрăшакансем майăн 3-мĕшĕнче районта чи малтан çĕрулми лартма тухнă. Хальлĕхе вĕсем "иккĕмĕш çăкăра" 15 гектар çинче лартнă. Ĕçченсем "Гала" сорт кăçал та пысăк тухăçпа савăнтарасса шанаççĕ.
Кашни кунпа тухăçлă усă курма тăрăшаççĕ вĕсем. Çĕрулми лартакан уйра Гера Парамонов, Алексей Мартынов, Леонид Ильин, Анатолий Вершков, Александр Индюков тăрăшаççĕ.
Çавăнпа пĕрлех районĕпе 5116 гектар çинче нумай çул ỹсекен курăксене сỹреленĕ. Кĕрхи культурăсене 2530 гектар çинче апатлантарнă. Кĕркунне çĕртме туса хăварнă çĕр лаптăкĕсене те культивацилес енĕпе ĕçченсем çине тăрсах ĕçлеççĕ. Хальлĕхе 3931 гектар çинче çак ĕçе пурнăçланă.
Ш.ЗЕЙНУТДИНОВ,
агроном.
Источник: "Каçал Ен"