28 апреля 2017 г.
Пушарнăйсен профессийĕ чи йывăрри тата чи хăрушшисенчен пĕри шутланать. Алхасакан "хĕрлĕ автана" парăнтарма çирĕп сывлăхпа хăрушлăхра çухалса кайман çын анчах пултарать. Çакăн евĕр вут-çулăм кĕрешỹçисем Комсомольскинче те пур. Ку вăл - районти 31-мĕш пушар чаçĕ. Унта 20 хастар тăрăшать.
- Эпир - районта пурăнакансен тăнăçлăхне сыхлакансем. Çĕр-çĕр çын пурнăçне çăлнипе пĕрлех вĕсен пурлăхне те кĕл тума памастпăр, - тет 31-мĕш пушар чаçĕн начальникĕ Сергей Алексеев.
Вут-çулăма алхасма памасăр ăна хăвăрт сỹнтересси - пушарпа кĕрешекенсен пирвайхи тивĕçĕ. Районти ĕçченсем хăйсен тĕп тивĕçне аван пĕлеççĕ, çавăнпа та вĕсем кашни самантрах, çĕрле е кăнтăрла, çула тухма хатĕр. Чаçри 4 пысăк автомашина яланах юсавлă, шыв енĕпе те кунта нихăçан та чăрмав çук. Кашни кунах караулта тăватă çын дежурствăра тăрать. Енчен те инкек пирки шăнкăравласа систерсен вĕсем икĕ автомашинăпа çула тухаççĕ. Алхасакан пушар йывăррисен йышĕнчен пулсан туслă ушкăн ĕçченĕсем ĕçтешĕсене пулăшма васкасах килсе çитеççĕ. Унсăр пуçне ял тăрăхĕсем пирки те манмалла мар. Тĕслĕхрен, "Урожай", "Труд", "Алга", "Дружба", "Восток", "Асаново" хуçалăхсен, Аслă Çĕрпỹел ял тăрăхĕпе Нĕркеç ялĕнче ирĕклĕ майпа пушар хуралĕнче тăракансем автомашинисене кирлĕ шайра тытаççĕ. -
Комсомольскинчи 31-мĕш пушар чаçĕнче опытлă ĕçченсем тăрăшаççĕ. Вĕсем хушнă, палăртнă ĕçе вăр-вар тата лару-тăрăва хакласа питĕ хăвăрт пурнăçлаççĕ, çынсене инкекре çăлаççĕ. Ĕç стажĕ пирĕн кашни ĕçченĕн 10 çултан кая мар. Унпа пĕрлех çемье династине тăсакансем те пур - Мамуткинсемпе Прохоровсем. Коллектив пирки калас пулсан, вăл пирĕн туслă. Ара, туслă та пĕр-пĕриншĕн тăрăшакан коллективра çеç ĕç кал-кал пырать, ун пирки нихăçан та манмастпăр, - паллаштарчĕ вырăнти ĕç-хĕлпе Сергей Алексеев начальник.
Сăмах май каласан, Сергей Алексеевич хăй те пултаруллă ертỹçĕ. Тăрăшуллă та харсăрскере ĕçтешĕсем ырă кăмăлĕпе тараватлăхĕшĕн, кăмăл çирĕплĕхĕшĕн хисеплеççĕ, сума сăваççĕ.
- Вăл пуçарнипе эпир чылай тупăшăва хутшăнатпăр, вĕренỹсем йĕркелетпĕр. Республика шайĕнче иртекен ăмăртусенче призерсен йышне пĕрре кăна мар кĕме пултартăмăр. Çакăн евĕр конкурс-пухусем пире ăсталăха ỹстерме пулăшаççĕ, çав вăхăтрах эпир ыттисен опычĕпе те паллашатпăр, лару-тăрăва хаклассине сỹтсе яватпăр, - терĕ караул начальникĕ Иван Порфирьев.
Районти пушар хăрушсăрлăхĕн правилисене предприяти-организацисенче тата харпăр хăй хуçалăхĕсенче епле пăхăннине вара пушар надзорĕн специалисчĕсем Дмитрий Кузьминпа Иван Чаркин тухса тĕрĕслеççĕ, ял-йышпа профилактика ĕçĕсем ирттереççĕ.
Пушар хуралĕнче вăй хуракансен умĕнче çивĕч ыйту сахал мар. Вĕсене вăраха ямасăр татса пама тăрăшаççĕ.
- Кăçал Раççейре пушар хуралне йĕркелесе янăранпа 368 çул çитрĕ. Çав ятпа районти хамăр чаçри тата ытти таврари ялсенчи пушар хуралĕн ĕçченĕсене, ветеранĕсене чун-чĕререн саламлатăп. Çăмăл мар ĕçĕрте çирĕп сывлăх, ăнăçу, кăмăл çирĕплĕхĕ тата телей сунатăп, - терĕ уяв ячĕпе ĕçтешĕсене ăшшăн саламласа Сергей Алексеевич.
ИСТОРИРЕН:
Раççей пушар хуралĕн историйĕ 1649 çулхи апрелĕн 30-мĕшĕнчен пуçланнă. Шăп çав кун пушар хăрушсăрлăхĕпе çыхăннă икĕ документа йышăннă - "Наказ о градском благочинии" тата "Уложение царя Алексея Михайловича". Унта пушарпа кĕрешессине йĕркелесе пырасси, çакăнпа çыхăннă яваплăх пирки çырса кăтартнă. Раççейĕн пĕрремĕш Президенчĕн Б.Н.Ельцинăн 1999 çулхи апрелĕн 30-мĕшĕнчи 539-мĕш Хушăвĕпе çак кун кашни çулах пушар хурал ĕçченĕсен професси уявне паллă тăваççĕ.
А.ИСАЕВА.
Источник: "Каçал Ен"