18 апреля 2017 г.
20-мĕш ĕмĕрĕн политика репрессийĕсем Раççей историйĕнче тарăн йĕр хăварнă. Вĕсем кашни çемьене пырса тивнĕ тесен те тĕрĕс пулĕ. Политика репрессине лекнисем хăйсем çеç мар, çемйипех шар курнă.
Çак кунсенче вара Чăваш кĕнеке издательствинче "Книга памяти жертв политических репрессий" кĕнекен виççĕмĕш томĕ пичетленсе тухнă. Кĕнеке биографи справкисемпе пуян. Пурĕ 6042 çын пирки çырса пĕлтернĕ.
Комсомольски районне илес пулсан, кĕнекере 46 çемье пирки çырса кăтартнă. Вĕсен кашнийĕн хăйсен историйĕ тата шăпи.
Акă, Янкасси ялĕнче çуралса ỹснĕ Андрей Игнатьевич Игнатьева 1930 çулта кулак тесе 1931 çулта çемйипех Свердловск облаçне кăларса янă. Кил хуçине 10 çула тĕрмене лартнă. Андрей Игнатьевича 1958 тата 1996 çулсенче, мăшăрне Ольгăна, Раиса, Елизавета, Анна, Иустиния хĕрĕсене 1996 çулта, Федор ывăлне 2013 çулта çеç реабилитациленĕ.
Нĕркеç ялĕнче пурăннă Анисим Якимович Таллерова та ЧАССР Патăрьел районĕн ĕç тăвакан влаç органĕсен йышăнăвĕпе 1931 çулта çемйипех Свердловск облаçĕнчи ятарлă поселенине кăларса янă. Çемье пуçĕ тепĕр икĕ çултанах вилнĕ. Мăшăрне Наталийăна, унтан тарнăшăн 1937 çулта 10 çуллăха ирĕксĕр хăварнă пулнă. Таллеровсен çемйин таса ятне 1993 тата 1997 çулта çеç тавăрса панă.
Çĕнĕ Кипеçре пурăннă Иван Васильевич Васильев та - шар курнисен йышĕнче. Ăна 2002 çулта çеç реабилитациленĕ.
Пĕр айăпсăр çынсем шар курнă. Вĕсен таса ячĕсем вара ĕмĕр пирĕн чĕресенче упранĕç. Нуша курнă çынсен пурнăç историйĕпе паллашас тесессĕн асăннă кĕнекене алла илĕр.
О.ИВАНОВА.
Источник: "Каçал Ен"