07 апреля 2017 г.
Чăваш Ен сыснасен Африка мурне пула чылай вăхăт ăнăçсăр регион шутланчĕ. Халĕ тинех республикăра ку статуса ылмаштарнă. Çапла тума Россельхознадзорăн управленийĕ йышăннă. Апла пулин те виçĕ районта - Улатăрта, Йĕпреçре тата Пăрачкавра - çавăн пекех Улатăр хулинче лару-тăрăва малашне те сăнаса тăрĕç.
Статуса ылмаштарни пирĕн тăрăхри аш-пăша ют регионсене ăсатма тата унтан хамăра кирлине кỹрсе килме май парать.
Маларах пирĕн республикăра Африка мурне пула карантин тесе йышăннăччĕ. Кăрлач уйăхĕн 25-мĕшĕнчен ăна пĕтернĕччĕ. Карантина официаллă майпа пăрахăçланă пулсан та ун чухне утă уйăхĕн 25-мĕшĕччен сыснасене тата унăн ашне республика тулашне илсе тухма, пĕрремĕш тата иккĕмĕш зонăсенче сысна сутма, ку зонăсенчен çак выльăха туянма юрамасть тесе пĕлтернĕччĕ.
Источник: "Каçал Ен"