07 апреля 2017 г.
Çак кунсенче Чăвашпотребсоюз Канашĕ республикăри потребительсен кооперацийĕн предприятийĕсемпе организацийĕсем хушшинчи 2016 çулхи экономика ăмăртăвĕн çĕнтерỹçисене палăртнă. Комсомольски райповĕ тата "Кооператор" ООО чылай енĕпе çĕнтерỹçĕсен шутне кĕнĕ.
Акă, райпо техникăпа пурлăх базине упраса хăварнăшăн тата малалла аталантарнăшăн, çăкăр продукчĕсем туянассипе, кондитер изделийĕсем туса кăларассипе пĕрремĕш вырăна тухнă. Çавăн пекех пирĕн коопераци предприятийĕсем производство ĕç-хĕлне аван аталантарнăшăн, çурма фабрикатсем кăларассинчи лайăх кăтартусемшĕн иккĕмĕш степеньлĕ Диплома тивĕçнĕ. Комсомольскисем хатĕрлев ĕçне (çĕрулми пуçтарасси), çăкăр пĕçерессине кирлĕ пек йĕркеленипе республикăра виççĕмĕш вырăн йышăнни хăех çирĕплетет.
"Кооператор" производство комбиначĕ те иртнĕ çул пĕтĕмлетĕвĕсемпе республика шайĕнче малтисен ретĕнче. Ĕç эффективлăхне ỹстерсе пынăшăн виççĕмĕш, алкогольсĕр сĕткенсем кăларассипе иккĕмĕш вырăнсем йышăннă, Диплома тивĕçнĕ. Малашне çаплах çитĕнỹсемпе ĕçлеме, производство хăвачĕсене ỹстерсе пыма сунатпăр вĕсене.
Л.ШУРЯШКИНА.
Источник: "Каçал Ен"