28 марта 2017 г.
Чăваш Республикин Ял хуçалăх министерствин выльăх-чĕрлĕхпе тата ăратлăхпа ĕçлекен пайĕ Чăваш Енри хуçалăхсенче пĕр талăкра мĕн чухлĕ сĕт сунине шутланă.
Официаллă кăтартусене ĕненес пулсан, республикăра мартăн 24-мĕшĕнче 444,8 тонна сĕт суса илнĕ. Пĕлтĕрхи çак вăхăтрипе танлаштарсан, ку 5,6 процент нумайрах. Анчах сĕт таварлăхĕ кăштах чакнă.
Пирĕн республикăри хуçалăхсенче кашни ĕнерен талăкра 14,7 килограмм сĕт сăваççĕ (пирĕн районта - 14,8 кг). Ку пĕлтĕрхи çак вăхăтринчен 5 процент ытларах.
Яланхи пекех, пысăк сăвăмлисен шутĕнче пĕрремĕш вырăнта - пирĕн районти "Асаново" ял хуçалăх производство кооперативĕ. Кунта кулленхи кăтарту - 24,7 килограмм. Шупашкар районĕнчи "Ольдеевская" агрофирма (23,6 кг), Етĕрне районĕнчи "Ленинская искра" колхоз (22,5 кг), Красноармейски районĕнчи "Красное Сормово" ООО (22,3 кг), Элĕк тăрăхĕнчи "Новый путь" ЯХПК (21,9 кг), Елчĕк районĕнчи "Эмметево" ООО (21,7 кг), Сĕнтĕрвăрри тата Тăвай районĕсенчи "Смак-Агро" ОООпа (20,7) "Дружба" ЯХПК (20 кг) ĕнисем те талăкра 20 килограмм ытларах сĕт антараççĕ.
Источник: "Каçал Ен"