28 марта 2017 г.
Мартăн 25-мĕшĕнче Чăваш Енре Раççей Федерацийĕн Строительство тата пурăнмалли çурт-йĕр хуçалăхĕн министерствин проект дирекцийĕн ертỹçи Павел Данилов тата унăн заместителĕ Джемал Сурманидзе ĕçлĕ çулçỹревре пулнă.
Чăваш Енре хула хăтлă хутлăхне йĕркелессипе нумай çуллăх проект программине хута янă май федераци ведомствин представителĕсем объектсене çĕнетмелли плана сỹтсе явма килсе çитнĕ. Аса илтеретпĕр, 2017 çулта проектпа килĕшỹллĕн Шупашкар хулине федераци хыснинчен 20 миллион тенкĕ пама йышăннă. Нухратăн иккĕ виççĕмĕш пайĕ - пурăнмалли çуртсен картишĕсене, пĕр пайĕ халăх йышлă çỹрекен вырăнсене хăтлама кайĕ.
Хăнасем, республикăри Минстрой ертỹлĕхĕ, муниципалитет йĕркеленĕвĕсен администрацийĕсен пуçлăхĕсем, хула Пухăвĕн депутачĕсем, архитекторсем, студентсем, общество организацийĕсен хастарĕсем "çавра сĕтеле" хутшăннă.
Проектсен дирекцийĕн ертỹçи Павел Данилов хăтлăх кĕртмелли хутлăхра мĕнле ĕçсем пурнăçлассине, общество вырăнĕсенчен хăшне хăтлăлатассине халăхпа сỹтсе явса йышăнмаллине çирĕп каланă.
"ХЫПАР".
Источник: "Каçал Ен"