21 марта 2017 г.
Республикăри драма кружокĕсемпе халăх театрĕсен "Яланах театр" конкурс-фестивалĕн зонăри 2-мĕш тапхăрĕ мартăн 19-мĕшĕнче Комсомольскинчи культурăпа кану центрĕнче иртрĕ. Кунта Патăрьел тата Шăмăршă районĕсенчи пултарулăх коллективĕсем килсе çитрĕç. Вырăнти культура ĕçченĕсем кỹршĕсене юрă саламĕпе, ырă кăмăлпа кĕтсе илчĕç.
Конкурс-фестивале Патăрьел районĕнчен килнĕ ушкăн "Пурнăç пылак сахăр мар" пьесăпа уçрĕ. Пикшихсем "Хĕрĕм валли 100 евчĕ" сценка лартрĕç. Ун хыççăн сумлă жюри тата куракансен умне Шăмăршă районĕнчи Шăмăршăри централизациленĕ клуб тытăмĕ "Маттур арăм" инсценировкăпа, Васансем "Компьютер" тата "Çул çинчи мыскара" миниатюрăсемпе, Палтиелсем "Врач патĕнче", Пуянкассисем "Чĕркуççи" сценкăсемпе тухрĕç.
Фестиваль валли пирĕн районти культура ĕçченĕсем виçĕ постановка суйласа илнĕ. Комсомольскинчи культурăпа кану çурчĕ çумĕнчи халăх театрĕ Н.Угаринăн "Улькка кинĕн виçĕ кинĕ" пьесин пĕр сыпăкне вылярĕ. Комсомольски ял поселенийĕн культура ĕçченĕсем А.Ильинăн "Реквием" поэзипе музыка композицине чуна пырса тивмелле кăтартрĕç. Хирти Мăратри культура çурчĕ çумĕнчи драма пултарулăх ушкăнне çỹрекенсем Денис Гордеевăн "Нăй карчăкĕ" калавĕ тăрăх лартнă сценкăра питĕ ăста вылярĕç.
Ялти артистсен пултарулăхне сумлă жюри хак пачĕ. Унăн йышĕнче пурте - Чăваш Республикин тава тивĕçлĕ артисчĕсем. Акă, Владимир Григорьев - республикăри халăх пултарулăх центрĕн театр ушкăнĕсемпе ĕçлекен методисчĕ, Çеçпĕл Мишши ячĕллĕ çамрăксен театрĕн актерĕ. Анна Кутузова - вырăс драма, Геннадий Кириллов - пукане театрĕн актерĕсем, Ольга Ерилеева - Шупашкар районĕнчи Апашри культура çурчĕ çумĕнчи халăх театрĕн режиссерĕ. Сцена ăстисем драмкружоксен ĕçĕсене хакланипе пĕрлех паха канашсем, сĕнỹсем те пачĕç. Ялти артистсен пултарулăх шайĕ çулсерен çĕкленсе пынине те палăртрĕç.
Пĕтĕмлетỹсем тусан вара чи маттур коллективсене кĕркунне иртекен республика шайĕнче пулакан "Тамаша" фестиваль-конкурса хутшăнма йыхравлĕç.
Л.ШУРЯШКИНА.
Источник: "Каçал Ен"