21 марта 2017 г.
Чăваш Республикин Наци телевиденине кабель сечĕпе тỹлевсĕр кăтартмалли каналсен йышне кĕртни республикăри тата унăн тулашĕнчи ентешĕмĕрсемшĕн пысăк парне пулчĕ. Аса илтерер: ăна "Триколор-ТВ" спутник антеннин 823-мĕш пускăчĕ çинче пăхма пулать. 36-мĕш пускăч çинче вара Наци радиовĕ ĕçлет. Атăлçи федераци округĕнче чăваш чĕлхипе пуплекен пĕрремĕш телевидени пирки район çыннисен кăмăл-туйăмне пĕлес тесе ятарлă ыйтăм йĕркелерĕмĕр.
Илдус Миннетуллин,
Комсомольски ялĕ, 62 çулта:
- Чунăмпа-юнăмпа тутар пулсан та, чăваш чĕлхине питĕ юрататăп. Наци телекуравĕ малтанах кирлĕ пулнă! Юрă-ташăпа чуна тыткăнланисĕр пуçне вăл республикăри ял хуçалăхĕ тата уйрăм районсем пирки тĕплĕн хатĕрленĕ передачăсем те эфира кăларать. Маншăн вара, ĕмĕрĕпе Комсомольскинче пурăнакан, çак район аталантăр тесе ырми-канми тăрăшнăскере, хамăрăн ĕç-хĕле пысăка хурса хаклани чи паха парне.
Василий Андреев,
Йỹç Шăхаль ялĕ, 71 çулта:
- Тĕнчери нумай каналпа юнашар наци куравĕн кăларă-мĕсем тăван чĕлхепе янрани - пысăк пулăм. Пуçласа курсан мăшăрпа иксĕмĕр те питĕ савăнтăмăр. Ку пирĕншĕн çемьене тахçан кĕтнĕ хăна хапăл тунă пекех туйăнчĕ. Ытларах мана халăх юрри-ташши килĕшет, халĕ спутник урлах тĕнчери тата республикăри çĕнĕлĕхсемпе те паллашатпăр.
Дина Александрова,
Хырай Ĕнел ялĕ, 38 çулта:
- Хамăрăн тăван чĕлхене питĕ юрататăп, вăл - çепĕç, шăнкăрти шыв юххи евĕр лăпкă та таса. Халĕ унпа эпир çеç мар, ытти халăхсем те савăнма пултараççĕ. Тинтерех кăна хута кайрĕ пулин те, ун урлă эпĕ нумай çĕнĕ хыпар пĕлме ĕлкĕр-тĕм. Ытларах çĕнĕлĕхсемпе йăла-йĕрке çинчен кăтартакан программăсене кăмăллатăп. Канал - тин çуралнă пепке евĕр. Вăл кунсерен аталанса малалла та савăнтарасса шанатпăр.
Ольга Ефимова,
Луцки ялĕ, 50 çулта:
- Вырăс ялĕнче пурăнатăп, апла пулин те чăваш наци телекуравне кăмăллатăп. Килте пĕччен, чунра пусăрăнчăкрах чухне юрă-ташă итлеме, курма юрататăп, кулăшла камитсем те мана питĕ килĕшеççĕ. Çĕнĕлĕхсене эпĕ ытларах вырăсла пăхатăп. Çак канал чăвашсене мăнаçланма парать, вĕсен йăли-йĕркине, культурине тĕнче шайĕнче хăватлăн сарăлма пулăшать.
Сăмах май, "Каçал ен" хаçатра телепрограммăра Наци куравĕн программине пичетлеме пуçларăмăр.
А.ИСАЕВА.
Источник: "Каçал Ен"