17 марта 2017 г.
Афган вăрçинче пуçне хунă Виктор Тумаков интернационалист салтака асăнса кашни çулах Тăманлă Выçли тĕп шкулĕнче волейбол турнирĕ иртет. Çак ăмăртăва кăçал та йĕркелерĕç. Мероприятие шкул директорĕ Ярослав Ильин уçрĕ. Вăл пухăннисене паттăр салтакăн ятне чĕрере упрама сĕнчĕ. Турнир уçнă çĕре афган вăрçин ветеранĕсем М.Киргизовпа В.Самаркин та хутшăнчĕç. Вĕсем вĕренекенсене спортпа туслă пулса çĕршыва хỹтĕлеме ачаранах хатĕрленмелли пирки каларĕç, спортсменсене ăмăртура ăнăçу сунчĕç. В. Николаев вара пухăннисене Виктор Тумаковăн ачалăхĕ çинчен каласа пачĕ.
Ăмăртăва пилĕк команда хутшăнчĕ. Вĕсен хушшинчи тупăшу çивĕч иртрĕ. Çапах та чи пултаруллисем вăййа çĕнтерỹпе вĕçлерĕç. Малти пĕрре-иккĕмĕш вырăнсене Шурут ялĕн çамрăкĕсем çĕнсе илчĕç (турнира икĕ команда тăратнă), виççĕмĕш вырăна Тăманлă Выçли ял çамрăкĕсем тивĕçрĕç.
Ярослав Николаевич çĕнтерỹçĕсене грамотăсемпе чысларĕ, асăнмалăх хаклă парнесем пачĕ. Турнира ирттерме пулăшнăшăн директор С.В.Кондратьевăна, В.В.Николаева, Д.А. Краснова чĕререн тав турĕ.
С.ПАВЛОВА.
Источник: "Каçал Ен"