17 марта 2017 г.
Тăван çĕршывăн тĕрлĕ кĕтесĕнче Аслă Отечественнăй вăрçăра çапăçса хыпарсăр çухалнисен шăпине паянхи кун та шыравçăсем тĕпчеççĕ. Вĕсем тăрăшнипех нумай салтакăн шăпи уçăмланать. Шырав ĕçĕ, паллах, пĕр-ик кунрах пулаканскер мар, вăл вăраха тăсăлакан япала. Палăртса хăвармалла, хыпарсăр çухалнă паттăрсен шучĕ те сахал мар.
Нумай пулмасть Кайнлăк ял тăрăхне Челябинск облаçĕнчен çыру килсе çитрĕ. Ăна Нижний Уфалей хулинчи "Астăвăм" шыравçăсен отрячĕн командирĕ Валима Шагаева шăрçаланă. Отряд пирки калас пулсан, вăл шырав ĕçне 2014 çулта пуçăннă, ушкăнра вара пурĕ 30 çын.
Çырура Валима Вильевна Йăлмахва ялĕнче 1896 çулта çуралнă Иван Николаевич Лебедев хыпарсăр çухалнă салтак Челябинск облаçĕнчи Троицки хулинчи госпитальте 1943 çулхи раштавăн 9-мĕшĕнче ĕмĕрлĕхех куçне хупнине тата паттăрăн тăванĕсене шыранине пĕлтернĕ.
Архив докуменчĕсем урлă эпир Иван Николаевич Лебедев çемйипе Йăлмахва ялĕнче вăрçă пуçланичченех пурăнни çинчен пĕлтĕмĕр. Анчах таврари халăхсем аякри Алтай, Томск, Новгород тăрăхĕсене куçса унта тĕпленнĕ вăхăтра арçын та мăшăрĕпе, Надежда Алексеевнăпа, инçе çула тухать. Вĕсем Новгород облаçĕнчи Холм районне кĕрекен Мильково ялĕнче вырнаçнă. Çак ялтан Иван тетене 1941 çулхи утă уйăхĕн 12-мĕшĕнче вăрçа ăсатнă.
Хисеплĕ вулаканăмăрсем!
Иван Лебедев ентеш çемйи çинчен тĕплĕнрех пĕлекенсемпе тăванĕсене Кайнлăк ял поселенин администрацийĕпе "Каçал ен" хаçат редакцине шăнкăравласа пĕлтерме ыйтатпăр.
П.ЗАЙЦЕВ.
Йăлмахва ялĕ.
Источник: "Каçал Ен"