14 марта 2017 г.
Йỹç Шăхаль ялĕнче çуралса ỹснĕ Николай Федорович Андреев ялти 7 класс вĕренмелли шкултан вĕренсе тухсан колхоз ĕçне кỹлĕнет. Нумай та вăхăт иртмест, Николая салтака каймалли çинчен калакан хут килет. Чăваш ачисене шанчăклă та яваплă вырăна - Китай чиккине илсе çитереççĕ, пограничник тивĕçне пурнăçлама шанаççĕ. Николай салтак тивĕçне пурнăçланă хыççăн Ростов облаçĕнче чарăнать. Унта вăл шоферсем хатĕрлекен училищĕне вĕренме кĕрет. Виçĕ уйăхран çамрăк салтак шофер специальноçне алла илсе тăван яла таврăнать. Çамрăк каччă Аслă Çĕрпỹелĕнчи крахмал заводне шофера ĕçе кỹлĕнет. Вăл 10 çул пĕр вырăнта ĕçлет. Николай Шурут ялĕнче çуралса ỹснĕ Клавдипе пĕрлешсе çемье çавăрать. Маттур хĕр Молотов ячĕпе хисепленекен колхоз ферминче ĕçленĕ. Сысна самăртакан уйрăмра 10 çул ытла тăрăшнă вăл. Бригадир ĕçĕнче те сахал мар вăй хунă. Ахальтен мар Клавдия Ивановнăн тăрăшулăхне колхоз правленийĕ пысăка хурса хакланă. Унăн сăнỹкерчĕкĕ колхоз правленийĕн Хисеп хăми çине лекме тивĕçлĕ пулнă. Маттур хĕрарăм социализмла ăмăрту çĕнтерỹçи паллăна илме тивĕçнĕ.
Андреевсем çичĕ ача çуратса тивĕçлĕ воспитани панă. Пурнăç çулĕ çине кăларнă. Светланăпа Альбина Екатеринбург хулинче медицина ĕçченĕсем пулса тăрăшаççĕ. Ытти ачисем Шупашкарта тĕпленнĕ. Ачисем мăшăрланнă, пурте çемйисемпе пурăнаççĕ. Хальхи вăхăтра вĕсен 11 мăнук. Ахальтен мар Клавдия Ивановнăна 1977, 1980 çулсенче "Ача амăшлăхĕ" медальсемпе чысланă. 1982 çулта 7 ача амăшне "Амăшĕн мухтавĕ" орденпа наградăланă.
Ватăсем 8 теçетке урлă каçнă пулин те кил хуçалăхĕнче тăрăшаççĕ. Сад пахчинче ĕçлеççĕ, пахча çимĕç çитĕнтереççĕ. Хурт-хăмăр çемйисене пăхма та вăй-хал çитереççĕ.
- Кил-çуртра тăрăшни, пыл хурчĕсене пăхни, хамăр çитĕнтернĕ пахча çимĕçе çини кун-çула вăрăмлатать, - тет вара савăнăçлă кăмăлпа Николай Федорович.
Кинемейпе мучи ачисемпе мунукĕсем тăван киле пуçтарăнсан еплерех савăнаççĕ тата.
- Кил-çурт ача сассипе тулсан, пурте шăкăл-шăкăл калаçса ларсан юрлас та савăнас килет, - терĕç Андреевсем.
Н.АРХИПОВ.
Источник: "Каçал Ен"