14 марта 2017 г.
Мартăн 9-11-мĕшĕсенче Хусан хулинче тутар ялĕсенчи предпринимательсен Пĕтĕм Раççейри VI форумĕ иртрĕ. Унта 41 регионти 748 çын хутшăнчĕ. Чăваш Республикин делегацийĕн йышĕнче Патăрьел, Комсомольски районĕсен, Çĕмĕрле хулин предпринимателĕсем пулчĕç.
Форумăн пĕрремĕш кунĕнчех дискусси площадкисенче ỹсен-тăран, выльăх-чĕрлĕх, пулă, вĕлле хурчĕпе çыхăннă ыйтусене тишкерчĕç, пĕр-пĕрин паха опычĕпе паллашрĕç.
Форумăн иккĕмĕш кунĕнче предпринимательсем Арск тата Балтаç районĕсене çитсе курчĕç. Вĕсен ĕç-хĕлĕпе паллашрĕç.
Пушăн 11-мĕшĕнче Раççейĕн тĕрлĕ регионĕсенчен килсе çитнисем хăйсен ял хуçалăх продукципе тата халăх промыслипе паллашма тата вĕсене туянма сĕнчĕç. Унти Киров, Пенза, Чулхула облаçĕсен, Пушкăртстанпа Тутарстан республикисен ял хуçалăх таварĕсемпе пĕрлех Чăваш Енри Пазюков предпринимателĕн, Шăнкăртамри "Али" ООО хатĕрлекен "Казылык" халяль продукцине туянма май пурри уйрăмах савăнтарчĕ.
Форумра алă ăстисен выставки те ĕçлерĕ. Урмаелĕнчи культура çурчĕ килте тĕртнĕ кавирсемпе чăннипех мухтанма пултарчĕ. Хитре кавирсем пурин кăмăлне те кайрĕç.
Районти "Мишар" халăх фольклор ансамблĕ форума хутшăннисене илемлĕ юрă-ташăпа савăнтарчĕ. Хăнасем артистсемпе пĕрле юрларĕç, ташларĕç.
Ф.ГИБАТДИНОВ.
Источник: "Каçал Ен"