10 марта 2017 г.
Çуркунне. Хĕвел кунран-кун çỹле хăпарать, çанталăкĕ ăшă. Анчах та, хушăран, хĕл сивви, вăхăчĕ иртсе кайманнине систерет, ытларах ирлĕ-каçлă. Часах, акă, тĕнче кайăксен сассипе тулĕ, пĕрремĕш чечексем çурăлĕç. Çак çурхи куна манăн анне, асанне, аппа, йăмăк, мăшăр - хĕрарăм сăнарĕпе танлаштарас килет: ара, пире пурнăç парнелекенĕ вăл хĕрарăм-çке. Ахальтен мар пуль шăпах çак уява, Пĕтĕм тĕнчери хĕрарăмсен кунне, пуш уйăхĕн пуçламăшĕнче, тĕнче хĕл ыйхинчен вăранакан самантра, уявлаççĕ.
Районти чи маттур дояркăсене уяв ячĕпе саламласа ĕçри ỹсĕмсемшĕн чысласси те йăлана кĕнĕ. Кăçал та сĕт сăвас енĕпе малти вырăн йышăнса пыракан ĕçченсене "Весна" ресторана пуçтарчĕç. Тĕрлĕ хуçалăхсенче тăрăшакан çирĕм çичĕ хĕрарăм çак чыса тивĕçрĕ. Вĕсем кашни ĕнерен, сахалран та, пилĕк пин ытла килограмм сĕт суса илме пултарнă!
Асăннă уява район администрацийĕн ял хуçалăх тата экологи пайĕн тĕп специалисчĕ Киям Гилачевич Гимальдинов уçрĕ. Вăл пухăннисене ăшшăн саламланă хыççăн районти кăтартусемпе паллаштарчĕ:
- Чи нумай сĕт сăвакан дояркăсем - "Асаново" ял хуçалăх производство кооперативĕнче тăрăшакансем. Вĕсен 2016 çулхи чи пысăк кăтартăвĕ - 8292 килограмм. Наталья Белова доярка пĕлтĕр кашни ĕнерен чи нумай сĕт сăвассипе палăрнă. Çак хуçалăхрах тăрăшакан Лариса Иванова (7840 кг), Людмила Чижикова (7466 кг), Вера Яковлева (7121 кг), Лариса Карсунова (7031 кг), Марина Пробкина (6928 кг) та ĕçтешĕнчен юлмаççĕ. Паллах, вĕсен кăтартăвĕсем 2015 çулхипе танлаштарсан кăшт чакнă.
"Искра" колхоз ĕçченĕ Инна Лебедева та 7 пин килограмм ытларах сĕт сăвать. "Слава", "Рассвет", "Труд" ял хуçалăх производство кооперативĕсен, "Урожай" колхоз дояркисем иртнĕ çул кашни ĕнерен 6000 килограмм ытларах сĕт суса илнĕ. 5 пин килограмран иртнисен хушшинче "Восток", "Труд", "Слава", "Дружба" ЯХПК, "Дубовка" ООО, Атласкинăн фермер хуçалăхĕн ĕçченĕсем. Маттур дояркăсем кăçал та иртнĕ çулхинчен лайăхрах кăтартусемпе тăрăшасса шанатпăр. Сире кашнинех хĕрỹ ĕçре ăнăçу сунатăп.
- Хĕрарăм вăл - пурнăç тыткăчи. Çемье илемĕпе ăшши унра пулнипе пĕрлех вăл килте, фермăра ĕçлеме вăй та, хăват та çитерет. Сирĕн ĕçри çитĕнỹсем район экономикине аталантарассинче пысăк вырăн йышăнаççĕ. Паянхи кун сĕт суса илесси ял хуçалăхĕнче чи пысăк тупăш кỹрекен отрасль шутланать. Малашне те çитĕнỹсем тумалла пултăр, - терĕ ĕçченсене саламласа ял хуçалăх тата экологи пайĕн начальникĕн ĕçĕсене пурнăçлаканĕ Вячеслав Никифоров.
Унпа пĕрлех уявра кашни дояркăна ĕçри пысăк кăтартусемшĕн тав сăмахĕ каласа Дипломсемпе тата Хисеп грамотисемпе чысларĕç.
Уява хитре сăн кĕртме районти хĕрарăмсен совечĕн председателĕпе Валентина Курицынăпа пĕрле культура ĕçченĕсем килсе çитрĕç. Лариса Носова, Альбинăпа Виктор Кокшинсем тата Валентина Тимофеева пухăннисене шăпчăк евĕр сассисемпе савăнтарчĕç. Юрă парни вара кашнин кăмăлнех уçма пултарчĕ.
А.ИСАЕВА.
Источник: "Каçал Ен"