03 марта 2017 г.
Районта халăх инструмен-чĕсемпе вылякансем йышлă теме çук. Апла пулин те вĕсем хăйсен ăсталăхне ỹстерме тăрăшни, çамрăк ăрăва тĕрлĕ инструментпа выляма вĕрентни пархатарлă. Шăпах ачасен пултурулăхĕпе, педагогсен пуçарулăхĕпе паллашас тесе кăçал районта пĕрремĕш хут халăх инструменчĕсемпе вылякансен "Озорные наигрыши" фестиваль-конкурсне йĕркелерĕç. Конкурса искусство шкулĕн тата ялсенчи хушма уйрăмĕсен воспитанникĕсем хутшăнчĕç. Халăх инструменчĕсемпе вылякан çамрăксен пултарулăхĕпе паллашма чăн та кăмăллă пулчĕ. Мĕнлерех тăрăшуллă вĕсем, хумханаççĕ пулин те хăйсене çирĕп тытаççĕ. Произведенисене çăмăллăн выляççĕ. Акă, Урмаел ялĕнчен килсе çитнĕ Разиль Шарафутдинов купăс калама ăста.
- Хатĕр гармонист, - терĕç ун пирки жюри членĕсем.
Унăн тусĕ Резиль Гималеев та юлташĕнчен юлмасть, купăспа çăмăллăнах вылять. Каччăсем тутар, чăваш кĕввисене илемлĕ янратрĕç. Инструментпа калама каччăсене Наиль Шариповпа Ильдус Шайдуллин педагогсем хăнăхтараççĕ. Лилия Калакова вĕренекен те чун ыйтнипе купăса алла илнĕ. Халĕ унăн тĕллевĕ - купăспа "пиллĕклĕх" калама вĕренесси. Пултаруллă ачасем фестиваль-конкурсра Диплома тивĕçрĕç. Лиза Зайцева гитарăпа илемлĕ вылянăран фестиваль-конкурс çĕнтерỹçи пулса тăчĕ. Татьяна Лепешкинăпа Ксения Семенова иккĕмĕш вырăна тивĕçрĕç.
Жюри членĕсем Тăманлă Выçлинчен килсе çитнĕ Никита Ильин пултарулăхне те палăртса хăварчĕç. Вăл конкурсăн дипломанчĕ пулса тăчĕ. Арина Кузьмина 2-мĕш вырăна тивĕçрĕ.
Хирти Выçли ялĕнчен килсе çитнĕ арçын ачасем кашăксемпе, параппанпа выляма ăста пулнине тĕслĕхпе çирĕплетсе пачĕç. Вĕсем - пĕрремĕшсем. Ушкăн ертỹçи Владимир Павлов пултаруллă ачасене хăй тавра пуçтарма пултарнă.
Виктор Кокшин гитарăпа калама вĕрентекен çамрăксем - Альберт Галкин, Женя Антонов, Никита Шорников - инструментпа илемлĕ вылянипе пĕрлех юрăсем те юрларĕç.
Аслăрах çулхисем хăйсен ăсталăхне çамрăксене пама тăрăшаççĕ. Районта халăх инструменчĕсемпе вылякан ачасем пурри пысăк пуянлăх.
А.ЕФРЕМОВА
Источник: "Каçал Ен"