28 февраля 2017 г.
Районта Хĕле савăнăçлă лару-тăрура ăсатса Çуркуннене савăк кăмăлпа кĕтсе илесси йăлана кĕнĕ. Кашни çулах çак ятпа район центрĕнче пурте пĕрле пухăнса савăнатпăр: юрлатпăр, ташлатпăр, спорт ăмăртăвĕсенче вăй виçетпĕр. Февралĕн 25-мĕшĕнче йĕркеленĕ уява ватти те, вĕтти те çитрĕ. Перекет банкĕ умĕнчи лапама килнисене хитре тум тăхăннă çăварни хĕрĕсемпе каччисем илемлĕ юрри-ташшипе савăнтарчĕç. Вĕсен савăк сасси пурне те уяв сцени патне йыхравларĕ. Эх! Тулли кăмăлпа савăнма тата мĕн кирлĕ?
Пурте пĕрле пухăнма сăлтав пурри те мĕнпе уяв мар? Çак кун района сумлă хăнасем килсе çитме май тупни вара уйрăмах пĕлтерĕшлĕ. Уява пухăннисене Шурут ялĕнче çуралса ỹснĕ ентешĕмĕр, Владислав Ильин вице-адмирал саламлани пурне те савăнтарчĕ.
- Тăван тăрăха çитни, сире курни пурăнма хавхалантарать. Сирĕнпе пĕрле йышра, тулли кĕрекере савăнни кун-çулăма вăрăмлатать. Эпĕ кунта чăннипех те канатăп, хавхаланатăп. Сирĕн пурнăçра савăнăçлă уявсем нумайрах та нумайрах пулччăр, кун-çулăр вăрăм, сулмаклă пултăр. Çирĕп сывлăх, тулли телей, иксĕлми вăй-хал сунатăп сире, ентешсем! - терĕ саламласа Владислав Алексеевич.
Уяв ячĕпе район çыннисене, хăнасене Чăваш Республикин Патшалăх Канашĕн депутачĕ Петр Краснов, "Кĕтне" ентешлĕх председателĕ Валери Туркай, район администрацийĕн пуçлăхĕ Алексей Самаркин тата ытти сумлă хăнасем саламларĕç.
Уяв сценарийĕ çав тери пуян та тĕрлĕ енлĕ пулчĕ. Юр пикесемпе Хĕл мучисем те уява килсе çитнĕ, çуркунне пики те кунтах. Купăсçăсем купăс каласа юрларĕç, пурте пĕрле пухăнса уяв картине тăчĕç. Ял тăрăхĕсенчен килсе çитнĕ артистсем хăйсен савăк юрри-ташшипе савăнтарчĕç. Районта вырăсĕ, тутарĕ, чăвашĕ - пурте пĕр килти пек килĕштерсе пурăннăран уявра тĕрлĕ халăх юрри-кĕвви шăранчĕ. "Мишар", "Кубняночка", "Каçал" ансамбльсен артисчĕсем куракансене çĕнĕ юрăсемпе савăнтарчĕç. Кĕçĕн Çĕрпỹел, Чĕчкен, Тукай, Кайнлăк, Асанкасси, Александровка, Комсомольски ял тăрăхĕсенчен килнĕ артистсем те куракансене хăйсен çепĕç, чуна пырса тивмелле юррисемпе тĕлĕнтерчĕç.
Çуркуннехи уяв юрă-ташăпа çеç мар, спорт ăмăртăвĕсемпе, тĕрлĕ выставкăсемпе пуян пулчĕ. Сăмахран, "Кĕтне" физкультурăпа спорт комплексĕнче ирĕклĕ майпа кĕрешсе, волейболла выляса вăй виçрĕç. Арçынсем Перекет банкĕ умĕнчи лапамра алă вăйне виçсе тупăшрĕç.
Алă вăйне виçсе Рустем Ильясов (75 килограмчченхи виçере) пĕрремĕш пулчĕ. 75 килограмран ытларах виçере Эдуард Иванов пурне те парăнтарчĕ. Çавăн пекех ăмăртура Ильшат Зарифзянов, Александр Иноходцев, Аймет Зарипов, Рустем Ильясов палăрчĕç. Ирĕклĕ майпа кĕрешекенсенчен Асанкасси вăтам шкулĕн команди мала тухрĕ, Тукай Мишерсем - иккĕмĕш, Урмаелсем виççĕмĕш вырăнта. Волейбол вăййинче "Тукай-1" командăна çитекенни пулмарĕ. Вĕсем - çĕнтерỹçĕсем. "Урмай" командăпа Чĕчкенсем иккĕмĕшпе виççĕмĕш вырăнсене пайларĕç.
Уяв кунĕ ачасем район центрĕнчи кану паркĕнче савăнчĕç. Вĕсем понипе çунашкапа ярăнса киленчĕç. Унпа пĕрлех юр çунасемпе ярăнакансем те йышлăн пулчĕç. Ача-пăчан хаваслă кулли таврана саланчĕ.
Нумай та вăхăт иртмĕ, шăнкăртатса шыв юхма пуçлĕ, çанталăк чĕрĕлсе вăй илĕ, пире илĕртекен çуркуннен пĕрремĕш чечекĕсем çурăлĕç, çутçанталăкăн чи илĕртỹллĕ те илемлĕ вăхăчĕ пуçланĕ. Ална пар, хаваслă Çуркунне!
А.ЕФРЕМОВА.
Источник: "Каçал Ен"