22 февраля 2017 г.
Каçал тăрăхне вăрăм ĕмĕрлĕ çынсемпе пуян тесен те тĕрĕсех. Хаçатра та юлашки вăхăтра вĕсем пирки тăтăшах пичетлесе тăтăмăр. Акă, февралĕн 14-мĕшĕнче Хырай Ĕнел ялне те Раççей Президентĕнчен В.В.Путинран салам хучĕ килсе çитрĕ - Анна Яковлевна Седлова 95 çулхи юбилейне паллă тăвать!
Анна Яковлевна Хырай Ĕнел ялĕнче 1922 çулта çут тĕнчене килнĕ. Хĕллехи пĕр сивĕ кун çуралнăскерĕн пурнăç çулĕ çăмăлах пулман. Хĕр вунтăхăр çулта чух Аслă Отечесственнăй вăрçă пуçланнă.
Çĕнтерĕве çывхартассишĕн тĕнчипе кĕрешнĕ вăхăтра Анна аппа та айккинче юлман - вăл ют çĕрсенче окоп чавнă çĕрте вăй хунă. Хĕр çапла икĕ çул Сăр хĕрринче ирттернĕ. Унтан ăна Мускав хулинчи çар хатĕрĕсем туса кăларакан "Молния" завода ĕçлеме янă. Кунта вăл минăпа бомба, "Катюша" валли снарядсем хатĕрленĕ.
- Вăрçă хирĕнче пуç хунисене, вăрçăран таврăннисене, çав вăхăтрах тылра тăрăшнисене те ан манăр. Вĕсем пурте тав сăмахĕсене тивĕçлĕ, мĕншĕн тесен пире телейлĕ тăвассишĕн, çĕршыв ирĕклĕхĕшĕн кĕрешнĕ, - тет час-часах Анна аппа.
Тăван ене таврăнсан Анна, ыттисем пекех, колхозра тар тăкнă, каярах Луцки чиркĕвĕнче старостăра тăрăшнă.
Паянхи кун Анна аппа ывăлĕн çемйипе пурăнать, тăватă мăнукĕпе тата мăнукĕн ывăлĕпе чун-чĕререн савăнать.
А.ИСАЕВА.
Источник: "Каçал Ен"