22 февраля 2017 г.
Февраль уйăхĕ маншăн паллă вăхăт. Февралĕн 10-мĕшĕнче, эпĕ çуралнăранпа 95 çул çитнĕ кун, Питĕрте пурăнакан хĕрсем, мăнуксем, мăн мăнуксем çитрĕç. Вĕсемпе пĕр вăхăтрах Шупашкар Наци банкĕнчен мана саламлама хăнасем килчĕç.
"Каçал енре" редакци коллективĕн, районти ветерансен канашĕн, "Советская Чувашия" хаçатра ЧР Журналистсен союзĕн правленийĕн саламĕсем пичетленчĕç. "Хыпарта" кун-çулăм, ĕç-хĕлĕм çинчен çырнă пысăк очерк пичетленчĕ.
Февралĕн 11-мĕшĕнче "Кĕтне" кафене манăн юбилее уявлама тăвансем, туссем, юлташсем, кỹршĕсем пухăнчĕç. Уяв мероприятине уçса райпо совечĕн председателĕ Е.И.Карпеев, район администрацийĕн пуçлăхĕн çумĕ Н.А.Петрова саламларĕç, парне пачĕç. Ветерансен районти совечĕн председателĕ Ю.С.Тимофеев ветерансен юхăмне активлă хутшăннăшăн пĕтĕм Раççейри ветерансен организацийĕн "Хисеплĕ ветеран" паллипе чысларĕ.
Юбилей каçне Альбина Васильевнăпа Виктор Александрович Кокшинсем питĕ ăста ертсе пычĕç. Кафере ĕçлекенсем (заведующийĕ Гелюсе Текмеева) уява пысăк шайра ирттерме мĕн кирлине пурне те туса пачĕç. Ветерансен "Шанăç" клубĕн членĕсем илемлĕ юрăсемпе савăнтарчĕç.
Февралĕн 15-мĕшĕнче, ĕçлĕ визитпа пирĕн тăрăхра пулнă май, мана республика Пуçлăхĕ М.В.Игнатьев саламларĕ. Район администрацийĕн тата Комсомольски ял тăрăхĕн пуçлăхĕсем А.А.Самаркин, Ю.Н.Митюков та пысăк хисеп турĕç. Михаил Васильевич Раççей Президенчĕ В.Путин янă саламлă çырупа паллаштарчĕ. Президент çырăвĕ маншăн, манăн çемьешĕн чи хаклă документ пек упранĕ.
Мана 95 çул тултарнă май çырусемпе те саламларĕç. Уява хутшăннисене, хутшăнманнисене те, хисепленĕшĕн чун-чĕререн тав тăватăп.
Ревокат МОИСЕЕВ.
Источник: "Каçал Ен"