22 февраля 2017 г.
Районти райпо пурнăçпа тан утать, тавар туянакансен ыйтăвĕсене туллин тивĕçтерет. Çакна ỹсĕмсемпе çитĕнỹсем çирĕплетеççĕ. Февралĕн 17-мĕшĕнче иртнĕ пайщиксен канашлăвĕнче 2016 çулта пурнăçланă ĕç-хĕле тата 2017 çула пурнăçлама палăртнă плансене сỹтсе яврĕç.
Райпо совечĕн председателĕ Евгений Карпеев пĕлтернĕ тăрăх, пĕтĕмĕшле иртнĕ çула аван кăтартупа вĕçленĕ: палăртнă ĕçсене пурнăçланă, магазинсене реконструкциленĕ, автоматизациленĕ. Пĕлтĕр çеç 25 суту-илỹ точкине автоматизацилеме май çитернĕ. Обществăлла апатлану предприятийĕсене çак тытăма кĕртме пуçлани те пысăк утăм. Халĕ вара аптекăсене автоматизацилесе регионти пĕрлехи сеть ĕçне йĕркелесе ямалла. Пĕлтĕр пурĕ 398,3 млн тенкĕ тавар çаврăнăшне кĕртнĕ. Бюджета 37 млн тенкĕ налук хывнă. Ĕçченсен пĕлĕвне ỹстересси çине пысăк тимлĕх уйăрнă, специалистсем "1С-Рарус: Торговый комплекс" программăна алла илнĕ. 155 специалист хăйсен пĕлỹ шайне ỹстерме пултарнă.
- Çăкăр-булка, кондитер продукцине ытларах туса илес, вĕсен ассортиментне ỹстерес тесе ĕçленĕ. Çавна май 587 тонна çăкăр-булка пĕçернĕ, 470 тонна кондитер изделийĕ хатĕрленĕ. Сĕт, аш-какай пуçтарас енĕпе те кăтартусем лайăх. Сăмахран, пĕлтĕр 1157 тонна сĕт, 109 центнер аш-какай хатĕрленĕ. Пĕтĕмĕшле 56,6 млн тенкĕлĕх продукци туса кăларнă. Пурлăхпа техника никĕсне ỹстерме 14 млн тенкĕ хывнă. Кăçал пурнăçламалли ĕç планĕсем те пысăк, - пĕлтерчĕ Евгений Иванович.
Кун-çул уттинчен юлмасăр тăрăшмаллине лайăх пĕлеççĕ ĕçченсем. Çавна май потребкоопераци ĕçне инновациллĕ аталантарасси çине пысăк тимлĕх уйăрма тивет. Малашнехи тĕллев - тавар ассортиментне ỹстересси, медицинăпа ветеринари аптекисен тытăмне, строительство суту-илĕвне, обществăлла апатлану предприятийĕсене аталантарасси тата ытти те.
Райпора тăрăшакансем шаннă ĕçе яланах вăхăтра тата пахалăхлă пурнăçлама хăнăхнă. Паянхи куна суту-илỹре 340 çын тăрăшать.
Финанс ĕçĕ-хĕлĕпе, пĕл-тĕрхи тупăшсемпе, тăкаксемпе райпон тĕп бухгалтерĕ Светлана Кокорева тата тĕп экономист Эмма Артемьева паллаштарчĕç. Райпо ĕç-хĕлне "Чăвашпотребсоюзăн" правлени председателĕн çумĕ Ирина Яшмолкина хакларĕ, пирĕн кооператорсем лайăх ĕçлесе пынине палăртса хăварчĕ. Комсомольскисем пĕлтĕрхи çулăн пĕтĕмлетĕвĕпе уйрăм хуçалăхсемпе ĕçлекен чи лайăх потребительсен обществисем хушшинче иккĕмĕшсем пулнă.
Пухăва килнĕ пайщиксем кăтартусемпе паллашнă хыççăн сĕнỹсемпе тухса калаçрĕç. Тĕслĕхрен, пластмасса тата кĕленче бутылкăсене пуçтарассине йĕркелесен пит аван пулмалла. Паянхи куна бутылкăсем ăçта килнĕ унта выртса çỹреççĕ, килте те пухăнаççĕ. Райпо ертỹлĕхĕ ыйтăва шута илме шантарчĕ. Çавăн пекех пайщиксене районта тĕрлĕ суту-илỹ точкисем кăмпа пекех ỹсни те пăшăрхантарать. Конкуренциллĕ лару-тăрура аталанма çăмăлах мар. Апла пулин те райпо магазинĕсенчи таварпа ял çыннисем кăмăллă пулни темрен те паха.
Специалистсем, ĕçченсем пĕлтĕр лайăх ĕçленине тĕпе хурса, кăçал тата та вăйлăрах тăрăшмаллине аван пĕлеççĕ. Вĕсен тĕллевĕ - туянакансен кăмăлне тивĕçтересси, паха продукци сĕнесси. Çакăн пек чухне çеç малалла утма, аталанма май пулĕ.
А.ЕФРЕМОВА.
Источник: "Каçал Ен"