17 февраля 2017 г.
Районта хỹтĕлевпе спорт уйăхлăхĕ иртнĕ май, çак кунсенче Хырай Ĕнел вăтам шкулĕнче вĕренекенсем воин-интернационалистсемпе тĕлпулу ирттерчĕç.
Унта вăрçă вут-çулăмĕ витĕр тухнă Александр Сорокин, Николай Белков, Виктор Гаврилов, Илья Сизов, Михаил Киргизов, Иван Мамуткин, Нурислам Хамбиков хутшăнчĕç. Вĕсем Афганистанри çар службине аса илчĕç, йывăр вăхăт пирки каласа пачĕç. Кашни каччă çĕршыв хỹтĕлевçи пулма хатĕр пулмаллине тĕс-лĕхсемпе çирĕплетрĕç.
Вĕренекенсемпе педагогсем винтовкăран тĕл перессипе вăй виçрĕç. Арçын ачасенчен Антон Воробьев 34 очко пуçтарса пĕрремĕш вырăна йышăнчĕ. Александр Мартынов - иккĕмĕш, Никита Кабалин - виççĕмĕш вырăнта. Хĕрсем те тĕл перессипе маттур. Татьяна Мукшина 35 очко пуçтарма пултарчĕ. Анжела Ильинапа Камилла Фомина - иккĕмĕшпе виççĕмĕш. Педагогсем хушшинче Е.Г.Квасов, И.А.Смирнов, Г.З.Гисматуллин палăрчĕç. Çĕнтерỹçĕсене Хисеп грамотисемпе тата парнесемпе чысларĕç.
Е.КВАСОВ,
физкультура учителĕ.
Источник: "Каçал Ен"