14 февраля 2017 г.
Тăманлă Выçлире пурăнакансем волейбол вăййине питĕ кăмăллаççĕ. Каçсерен шкул спортзалĕ пĕртте пушă тăмасть, унта ял çамрăкĕсем, шкул ачисем, ашшĕ-амăшĕ тренировка ирттереççĕ.
Февралĕн 2-мĕшĕнче Тăманлă Выçли шкулĕнче волейбол турнирĕ иртрĕ. Ăна Амăшĕпе Ашшĕн çулталăкне халалларĕç. Çак турнира пилĕк команда хутшăнчĕ: ашшĕсем, амăшĕсем, хĕрарăм учительсем, арçын учительсем тата шкул ачисем. Ăмăртăва пуçтарăннисене шкул директорĕ Я.Н.Ильин саламларĕ, ăнăçу сунчĕ.
Командăсем хушшинче тупăшу питĕ хĕрỹ иртрĕ. Шкул спортзалĕ вĕренекенсен сассипе тулчĕ, пĕр-пĕрне хавхалантарни илтĕнсе тăчĕ. Тупăшура арçын учительсем ял çамрăкĕсемпе пĕрле йĕркеленĕ команда çĕнтерчĕ. Иккĕмĕш вырăнта - ашшĕсен "Ракета" команди, амăшĕсен "Венера" команди - виççĕмĕш.
Амăшĕсем пирки уйрăммăн каласа хăвармалла. Хуçалăхри ĕçсене вĕçленĕ хыççăн вĕсем ỹркенмесĕрех эрнере виçĕ хут каçсерен шкул спортзалне тренировкăна çỹреççĕ, хăйсен ăсталăхне туптаççĕ. Уйрăмах А.Надуковăна, А.Прокопьевăна, А.Яковлевăна, Н.Лукияновăна, А.Киргизовăна, В.Алексеевăна, Т.Федоровăна палăртса хăварас килет. Вĕсем волейбол вăййине чăннипех юратаççĕ.
Пирĕн патра вĕренекен ачасен ашшĕ-амăшĕ малашне те шкулта иртекен мероприятисене активлă хутшăнасса шанса тăратпăр. Пурне те сывă пурнăç йĕркине пăхăнса пурăнма сĕнетпĕр.
Т.ШИНГАЛОВА,
вĕрентекен.
Источник: "Каçал Ен"