14 февраля 2017 г.
Турхан ялĕнче çуралса ỹснĕ Анастасия Ильинична Давыдова çак кунсенче 90 çул тултарчĕ.
Çамрăк хĕр пахча çимĕç бригадирне Василий Давыдович Давыдова качча тухнă. Унăн пилĕк ачине ура çине тăратма пулăшнă. Вăл вăхăтра арçыннăн кĕçĕн хĕрĕ, Юля, иккĕре кăна пулнă. Хăйĕн ачисем пулмасан та, Наççа аппа ачасене юратса пăхса ỹстернĕ. Вăл мĕн тивĕçлĕ канăва тухичченех "Знамя" колхозра тăрăшнă, кулленхи ĕçре ырă ята тивĕçнĕ. Ĕçри пултарулăхшăн Анастасия Ильиничнăна вăл тĕрлĕ медаль, Хисеп хучĕсем парса чыс тунă, "Ĕç ветеранĕ" ята тивĕçнĕ. Тивĕçлĕ канăва тухсан та килте пĕртте ахаль ларман хĕрарăм. Василий Давыдовичпа пĕрле карта тулли выльăх-чĕрлĕх тытнă, пахча çимĕç ỹстернĕ. Вăрçă ветеранĕ Василий Давыдович икĕ урасăр юлсан ăна пăхма та вăй çитернĕ çирĕп хĕрарăм. Пĕччен юлсан та Анастасия Ильинична 80 çула çитичченех ĕне пăхма пăрахман. Паянхи кун Наççа аппа Юля хĕрĕ патĕнче Кĕçĕн Çĕрпỹел ялĕнче пурăнать.
Çак савăнăçлă кунпа ветерана район администрацийĕн организаци пайĕн пуçлăхĕ Любовь Пудовкина, Кайнлăк тата Аслă Çĕрпỹел ял тăрăхĕсен специалисчĕсем Татьяна Самарина, Александр Иванов тата Анастасия Ильиничнăн çывăх тăванĕсем саламларĕç. Любовь Львовна Раççей Президенчĕ Владимир Владимирович Путин янă Тав çырăвне вуласа пачĕ, хаклă парне парса чысларĕ. "Наççа аппа, эсир пирĕншĕн, хальхи ăрушăн, тĕслĕх, хисепе тивĕçлĕ çын. Эпир сирĕнпе чăннипех мухтанатпăр, сывлăху ан хавшатăр, çывăх çыннăрсен чун-чĕре ăшшине туйса тăрăр, малашне те сирĕн килте килĕшỹ хуçалантăр", - терĕ вăл ватăна саламласа.
А.ИВАНОВ.
Источник: "Каçал Ен"