14 февраля 2017 г.
Февралĕн 11-мĕшĕнче пĕтĕм çĕршывĕпех "Раççей йĕлтĕр йĕрĕ" ăмăрту иртрĕ. Чăваш Енре тата районта пурăнакансем йĕлтĕр çине тăчĕç. Чăваш Республикин Спорт министерствин пресс-служби пĕлтернĕ тăрăх, кăçалхи 35-мĕш чупăва 26 районпа хулара 60 пине яхăн йĕлтĕрçĕ хутшăннă. Районта старта тухакансен йышĕ те самаях пысăк пулчĕ. Ял тăрăхĕсенче те ватти-вĕтти, пурте йĕлтĕр сырса ярăнчĕç. Вăрман хĕрринче йĕркеленĕ чупу чăн-чăн спорт уявне çаврăнчĕ.
Пухăннисене район тата район администрацийĕн пуçлăхĕсем Хасиятулла Идиатуллинпа Алексей Самаркин, Комсомольски ял тăрăхĕн ертỹçи Юрий Митюков саламларĕç.
- Ăмăрту çынсене çывăхлатать, çемьесене çирĕплетет, ĕç коллективĕсене пĕтĕçтерет. Пирĕн районта спортпа кăсăкланакансен йышĕ ỹсни уйрăмах савăнтарать. Сывă пурнăç йĕркине тытса пыракансемпе çамрăксене, спорта юратма вĕрентекенсене пысăк тав. Çитĕнекен ăру сывă та хастар пуласси пирĕнтен нумай килет. Сывлăх чи пысăк пуянлăх пулнине нихăçан та манмалла мар, - терĕ Алексей Александрович старта тухас умĕн.
Йĕлтĕрçĕсем ỹсĕмне кура ăмăртрĕç. Чи малтанах шкул çулне çитменнисем тата кĕçĕн классенче вĕренекенсем старта тăчĕç. Кайран арçынсемпе хĕрарăмсем йĕлтĕрпе ярăнчĕç.
ВИП-чупăва пуçлăхсем, предприяти-организаци ертỹçисем хутшăнчĕç. Вĕсем 1 километрлă дистанцие чупрĕç. Ыттисем вара 3 тата 5 çухрăма парăнтарчĕç. Чи пултаруллисене медальсемпе, парнесемпе, кубоксемпе тата дипломсемпе чысларĕç.
А.ЕФРЕМОВА.
Источник: "Каçал Ен"