10 февраля 2017 г.
Февралĕн 6-мĕшĕнче Хирти Явăш ялĕнче пурăнакан тыл ĕçченĕ, хисеплĕ çын Ольга Павловна Комиссарова 90 çул тултарчĕ.
Юбилей ячĕпе маттур кинемее çывăх çыннисемпе пĕрлех район администрацийĕн пуçлăхĕн çумĕ Надежда Петрова, Элпуç ял тăрăхĕн пуçлăхĕ Владимир Гордеев, "Дружба" ЯХПК ертỹçин çумĕ Альберт Незиров саламларĕç. Надежда Александровна ĕç ветеранне В.В.Путинăн салам çырăвне вуласа пачĕ, асăнмалăх парнепе чыс турĕ.
90 çул пурăнса темĕн те тỹсме тивнĕ унăн. Вăл тапхăртисене ачалăхпа та, çамрăклăхпа та киленме тỹр килмен. Амăшĕ ир вилнĕрен çемьери йывăрлăхсем 15-ри хĕр çине тиеннĕ. Йăмăкĕсемпе шăллĕсене пăхнă, килти ĕçсене пурнăçланă. Унпа пĕрлех колхозри ĕçсене хутшăннă, фермăра тăрăшнă. Пуçне усман, йывăрлăха çĕнтерсе çут малашлăх пирки ĕмĕтленнĕ.
Ольга Павловнăпа Николай Павлович Комиссаровсем 5 ача çуратса тивĕçлĕ воспитани панă. Шел пулин те, мăшăрĕ çĕре кĕнĕренпе 30 çул иртнĕ. Кинемей ачисене, мăнукĕсене яланах пулăшма тăрăшать. Телейĕ те - ăрăва тăсакансенче.
- Пире, ватăсене, ачасем, çывăх тăвансем хисеп туни чĕре çине çу сĕрнĕ пекех. Тавах пурне те. Сирĕн те ĕмĕрĕр вăрăм та такăр, сывлăхăр çирĕп пултăр, - терĕ савăнса Ульха аппа.
(ХАМĂР ИНФ.).
Источник: "Каçал Ен"