07 февраля 2017 г.
Иртнĕ ĕмĕр пуçламăшĕнче çуралса ỹснисем, ытларах вăй-хал ĕçĕпе пурăннине кура-и е ытти сăлтавпа, чăннипех те çирĕп çынсем. Çакна статистика та çирĕплетет. Акă, районта январĕн 1-мĕшĕ тĕлне кăçал 100 çул тултаракан 3 ватă, 95 çула çитекен 6 çын тата 90 çул урлă ярса пусакан 46 ветеран шутланнă. Тăхăр теçетке çул пурăннисене кашнине, вĕсем çĕршыв аталанăвне пысăк тỹпе хывнине хисеплесе, Раççей Президентĕнчен салам çырăвĕ килет.
Тукай ялĕнчи педагогика ветеранĕн С.Т.Казакован килне февралĕн 2-мĕшĕнче сумлă уяв çитрĕ. Вăл 90 çул тултарчĕ. Çак сăлтавпа унăн пỹрт-çурчĕ хăнасемпе тулчĕ. Район администрацийĕн пуçлăхĕн çумĕ Светлана Ульдина София Трофимовнăна Владимир Путинран килнĕ салам открыткине тата асăнмалăх парне парса чысларĕ. Юбиляра хисеплесе Тукай ял поселенийĕнчен, Çĕнĕ Мăрат вăтам шкулĕнчен тата вырăнти культура çурчĕсенчен те саламлакансем пулчĕç. Паллах, унăн вĕренекенĕсем те - Михаил Афанасьев, Владимир Моторин тата Галина Степанова - чунĕсенчи ăшă сăмахĕсене калама çитрĕç. Юратнă амăшĕпе çакăн пек паллă кунра пĕрле пулма хĕрĕ Галина, ывăлĕсем Александрпа Владимир та тăван киле пуçтарăннă. Салам сăмахĕсем янранă хыççăн шăкăл-шăкăл калаçу пуçланчĕ. Кил хуçипе хăнасем иртнине аса илчĕç, юрларĕç, шỹтлерĕç те.
София Трофимовна хăйĕн кун-çулне аса илнине пурте тимлĕн итлерĕç. Пурнăç çулĕ ансат пулман унăн. Аслă Отечествăлла вăрçă çĕршыври пĕтĕм çыннăн çутă ĕмĕчĕсене татнă, шăпине хуçнă, ачалăхпа яшлăхне тĕксĕмлетнĕ. Софийăн ашшĕ Трофим Тимофеевич Ямщиков 1942 çулта фронта тухса кайнă та унта хыпарсăр çухалнă. Нимле йывăрлăха пăхмасăрах хĕр-ача вĕренме ăнтăлнă. Вăл педагог пулса тăрса пĕтĕм пурнăçне çамрăк ăрăва тивĕçлĕ пĕлỹпе воспитани парассине халалланă. Географи предметне вĕрентнĕ педагогăн ĕç стажĕ - 34 çул. Мăшăрĕпе, Александр Макаровичпа, икĕ ывăлпа пĕр хĕре кун çути парнеленĕ, виç-çĕшне те аслă пĕлỹ илме май туса панă. Шел, мăшăрĕ йывăр чирлесе выртнă хыççăн темиçе çул каялла çут тĕнчерен уйрăлнă.
София Трофимовна халь Нина йăмăкĕпе кăштăртатса пурăнать. Ачисемпе ултă мăнукĕ, вĕсен 9 тĕпренчĕкĕ вара пĕрмаях килсе çỹреççĕ, кил-çуртри ĕçсенче пулăшаççĕ. Ветеран хăй те пахчара ĕçлеме, чечексем ỹстерме юратать. Çулĕ- сене пăхмасăрах, ăс-тăнĕ çивĕч унăн, шỹтлеме те, çынпа пĕрле юрлама та ухата вăл. Хăйне хисеплесе саламланăшăн Раççей Президентне те, хăнасене те чĕререн тав турĕ. Юбилее пуçтарăннисем София Трофимовнăна Турă панă кун-çулпа тата чылай çул киленсе пурăнма ырлăх-сывлăх сунчĕç.
Л.ШУРЯШКИНА.
Источник: "Каçал Ен"