07 февраля 2017 г.
Раççей премьер-министрĕ Дмитрий Медведев регионсене тĕрлĕ сфера валли укçа уйăрса парасси çинчен калакан хушусене алă пуснă. Çав шутра Чăваш Ен те тĕрлĕ программăна пурнăçлама пысăк укçа илет - пĕтĕмпе 1,4 миллиард тенкĕ ытла.
"Экономика аталанăвĕ тата инноваци экономики" программăна пурнăçламашкăн федерацин 82 субъектне 7,5 миллиард тенкĕ пама палăртнă. Ку укçа - пĕчĕк тата вăтам предпринимательлĕхе, фермер хуçалăхĕсене, çамрăксен предпринимательлĕхне пулăшма каять. Чăваш Ен тỹпи - 106 миллион тенкĕ ытла.
Чăваш Енĕн ял хуçалăхне аталантармашкăн 478 миллион тенкĕ уйăрма палăртнă. Федераци укçи АПК объекчĕсене тума тата çĕнетме, çавăн пекех отрасльти инвестици кредичĕсен процент виçин пĕр пайне саплаштарма кайĕ.
Регионăн çул-йĕр хуçалăхĕ валли те Мускав хушма укçа парать. Патшалăхăн "Транспорт системин аталанăвĕ" программипе килĕшỹллĕн Чăваш Ен 340 миллион тенкĕ илĕ.
Республика ОМС программине кĕртмен пысăк технологиллĕ медпулăшу валли 31,7 миллион тенке яхăн илет.
Чăваш Енри театрсемпе ялсенчи клубсем те пулăшусăр юлмаççĕ. Пĕтĕмпе - 15 миллион тенкĕ ытла. Çав шутра 5,5 миллион тенкĕ - 300 пин çын таран пурăнакан хуласенчи муниципалитетсен театрĕсен пултарулăх ĕçне пулăшма, вĕсен пурлăхпа техника никĕсне çирĕплетме. 9,8 миллион тенке ялсенчи культура учрежденийĕсене аталантарма ярĕç.
Патшалăхăн 2013-2020 çулсенче вĕрентĕве аталантармалли программипе килĕшỹллĕн 2017 çулта шкулсен строительстви, юсавĕпе реконструкцийĕ валли республика федераци бюджетĕнчен 405,5 миллион тенкĕ ытла илĕ.
Источник: "Каçал Ен"