03 февраля 2017 г.
Хирти Сĕнтĕр ял тăрăхĕнче пурăнакансем спортпа туслă пулнине яланах тĕслĕхпе çирĕплетеççĕ. Нĕркеç вăтам шкулĕнче пĕлỹ пухакансем те, аслисем те районти, республикăри ăмăртусене хутшăнмасăр юлмаççĕ. Ял тăрăхĕн территорийĕнче те тăтăшах тĕрлĕ тупăшусем йĕркелеççĕ. Пушă вăхăтра асăннă тăрăхра пурăнакансем хĕрсе кайсах хоккейла выляççĕ. Çĕнĕ Кипеçри, Нĕркеçри хоккей площадкисенче яланах вылякансен сасси илтĕнет. Канмалли кунсенче вара унта пушшех те çын нумай.
Акă, январĕн 29-мĕшĕнче Нĕркеç ялĕн хоккей площадкинче черетлĕ ăмăрту иртрĕ. Тупăшăва хăй вăхăтĕнче хоккейла выляссипе хастарлăхпа палăрнă спортсменсенчен пĕрне - Владимир Воронова - халалларĕç. Турнира йĕркелесе янăранпа 7 çул çитрĕ, вăл хăйĕн пĕлтерĕшне кашни çулах ỹстерсе пырать. Унта хутшăнакансен йышĕ çулран-çул ỹсет.
Чи малтанах пухăннисене Хирти Сĕнтĕр ял тăрăхĕн пуçлăхĕ Геннадий Ефремов, Владимир Вороновăн ывăлĕсем Владимирпа Иван саламларĕç, ăмăртура çитĕнỹсем сунчĕç.
Тупăшу чăннипех те хĕрỹ пулчĕ. "Кубня", "Гигант", "Елчĕк" командăсем пĕр-пĕрне парăнасшăн пулмарĕç. Апла пулин те хоккей площадкин хуçи, "Кубня" команда, кубока алăран вĕçертмерĕ. Елчĕкрен килсе çитнĕ спортсменсене 9:3 шутпа парăнтарчĕ.
Ăмăртура чи лайăх вылякансене те палăртрĕç. "Кубня" командăра вылякансем С.Тимофеев, А.Петров, П.Романов, А.Добронравов ("Елчĕк") чи лайăх тапăнса вылякан ята тивĕçрĕç. Чи лайăх вратарь - Д.Можаев. В.Васильев чи усăллă вăйăçă тесе палăртрĕç.
Аслăрах çулхисем хăйсем çеç выляса ăсталăхне ỹстермеççĕ, шкул ачисене те пĕрле явăçтараççĕ, вĕсене вăйă вăрттăнлăхĕсене уçса параççĕ. Ахальтен мар Нĕркеç вăтам шкулĕн вĕренекенĕсем республикăри "Золотая шайба" турнира хутшăнса 8-мĕш вырăна тухма пултарнă. Çамрăксем аслисенчен тĕслĕх илеççĕ.
А.ЕФРЕМОВА.
Источник: "Каçал Ен"