31 января 2017 г.
Тавралăх шап-шурă юрпа витĕнсенех йĕлтĕрпе ярăнма юратакансем йĕлтĕр çине тăраççĕ. Район центрĕнчи, вĕренỹ учрежденийĕсенчи стадионсемпе футбол уйĕсем хĕлле катока тата йĕлтĕр трассине çаврăнаççĕ. Унпа пĕрлех вара вăрманта йĕлтĕр сырса ярăнакансем те нумай. Кăçал пушшех те пулĕ тетĕп. Комсомольски вăрманĕнче çав тери чаплă йĕлтĕр трасси пур. Ярăн та ярăн чун каниччен. Çакна эпĕ çеç мар, ыттисем те çирĕплетеççĕ. Кунта вара кăнтăрла та, каçхине те ярăнса киленме май пурри район çыннисене пушшех савăнтарать.
- Район ертỹлĕхне тата пуçаруллă çынсене тавах, - теççĕ районта пурăнакансем.
Йĕлтĕр спортне кăмăллакансем чылай ăмăртăва хутшăнма ĕлкĕрчĕç те ĕнтĕ, шкул ачисем те, вĕрентекенсем тата тĕрлĕ учрежденисенче, предприятисенче тăрăшакансем трассăна тĕрĕслесе пăхрĕç. Январĕн 28-мĕшĕнче вара вăрманта республика шайĕнчи пысăк ăмăрту иртрĕ. Спортсменсем Рафикпа Рашид Тимергалеевсен парнисене çĕнсе илессишĕн старта тухрĕç. Икĕ пĕртăван вăхăтĕнче маттур та хастар спортсменсем пулнă. Иккĕшĕ те йĕлтĕрпе ăмăртса сахал мар çитĕнỹ тунипе пĕрлех, маттур çамрăк спортсменсем хатĕрленĕ. Вĕсем паянхи кун та йĕлтĕр сырса чупаççĕ. Ветерансемшĕн çакă - чун киленĕçĕ. Районта пурин кăмăлне те тивĕçтерекен йĕлтĕр трасси тума пултарнишĕн Тимергалеевсем чунтан савăннă.
- Паян кунта çамрăксем, аслăрах çулхисем йĕлтĕр сырса ярăнаççĕ. Вăрманта кунĕпех, иртен пуçласа каçченех, шăв-шав илтĕнни савăнтарать. Сывă пурнăç йĕркине пăхăнакансен йышĕ ỹсет. Пирĕн, аслисен, çамрăксене тĕслĕх кăтартмалла, спортпа туслаштармалла. Паянхи ăмăртăва, сивве пăхмасăрах, республикăри нумай спортсмен килсе çитни те хăпартлантарать, - терĕ Рафик Зиганшович.
Сăмах май каласассăн, чăн та, ăмăртăва, Мари Эл республикинчен, Шупашкар, Çĕнĕ Шупашкар хулисенчен, Красноармейски, Йĕпреç, Вăрнар, Çĕмĕрле, Елчĕк, Канаш, Тăвай, Куславкка, Патăрьел районĕсенчен килсе çитнĕ.
Пухăннă спортсменсене чи малтанах Комсомольски районĕн тата администрацийĕн пуçлăхĕсем Хасиятулла Идиатуллин, Алексей Самаркин, Рафикпа Рашид Тимергалеевсем спорт уявĕпе салам-ларĕç, ăмăртура ăнăçу сунчĕç.
Пуçланчĕ вара хĕрỹ тупăшу. Йĕлтĕр ăмăртăвне 24 çултан пуçласа 70 çултан иртнĕ спортсменсем хутшăнчĕç. Арçынсемпе хĕрарăмсем 3 тата 5 километрлă дистанцисенче вăй виçрĕç. Чи малтанах арçынсем старта тухрĕç. Пирĕн район спортсменĕсем çулĕсене кура тĕрлĕ ушкăнра палăрчĕç. Акă, Александрпа Иван Симендеевсем хăйсен ушкăнĕнче - 1, 4-мĕш, Александр Архипов - 5-мĕш вырăнсене йышăнчĕç. Владимир Николаев 45-49 çулхисем хушшинче 1-мĕш вырăна тухрĕ. Зуфар Тимаев дистанцире 3-мĕш, Вячеслав Шленкин - 8-мĕш, Олег Чертынов 13-мĕш пулчĕç. Çавăн пекех Георгий Миронов (10-мĕш), Николай Волков (7-мĕш), Николай Ятманов (3-мĕш), Анатолий Давыдов (6-мĕш), Алексей Самаркин (3-мĕш), Александр Горбунов (2-мĕш) ăмăртура палăрчĕç.
Хĕрарăмсенчен вара Венера Арсентьева 35-39 çулхисем хушшинче 2-мĕш вырăна тивĕçрĕ, Галина Волкова 45-49 çулхисем хушшинче 3-мĕш вырăна алăран вĕçертмерĕ. Татьяна Лапшина та хăйĕн ỹсĕмĕнче 3-мĕш пулчĕ.
Çĕнтерỹçĕсене Хисеп грамотисемпе тата парнесемпе чысларĕç.
Спортсменсем чăннипех те маттур пулнине, йĕлтĕрпе ярăнма, ыттисемпе тупăшма хатĕррине дистанцие чупса тухса çирĕплетрĕç. Районта пурăнакансем çеç мар, ытти хуласемпе районсенчен килнисем те йĕлтĕр трасси çав тери лайăх пулнине, ярăнма кăмăллине сăмахпа, ĕçпе çирĕплетни пирĕншĕн калама çук паха.
А.ЕФРЕМОВА.
Источник: "Каçал Ен"