24 января 2017 г.
Крещени (Кăшарни) - православи чиркĕвĕн чи пысăк уявĕсенчен пĕри. Шурут ял тăрăхĕнчи ялсенче пурăнакансем çак уява кашни çулах Юнтапари пĕве хĕрринче ирттереççĕ.
Кăçал та уява йышлăн пухăнчĕç. Малтанах Юнтапари клуб ертỹçи Анатолий Кузьмин ертсе пынипе ял çамрăкĕсем пăр касса шыва кĕмелли вырăн хатĕрлерĕç. Шурут чиркĕвĕн настоятелĕ Вадим иерей шыв хĕрринче кĕлĕ ирттерчĕ. Ун хыççăн çамрăксем те, аслăрах çулхисем те шыва кĕчĕç. Вĕсем валли ăшăнма, хывăнса тумланма палатка та лартнă. Палатка вырнаçтараканĕ - А.И.Алексеев.
Ял çыннисем те, хăнасем те вĕри чей ĕçрĕç, пулă шỹрпи çирĕç. Тутлă шỹрпе çитерекенсене пурте ăшшăн тав турĕç.
Уяв туса панăшăн ял халăхĕ Шурут ял тăрăхĕн ертỹçине Сергей Маштанова тав тăвать.
Çакăн пек уявсем йăлана кĕрсе пыни пурне те савăнтарать. Манас марччĕ асатте-асаннесен праçникĕсене.
Т.КАЗАКОВА.
Источник: "Каçал Ен"