20 января 2017 г.
Чăваш Республикинчи туризм отрасльне епле аталантармалла? Хамăр тăрăха туристсене епле илĕртмелле? Туристсене мĕнпе кăсăклантармалла? Çак тата ытти ыйтăвăн хуравне уçăмлатнă Шупашкарти хăна çурчĕсемпе ресторансен "Гарден Спа Отель" комплексĕнче. Унта "Пулас Чăваш Ен, туризмпа сервиса аталантарасси" темăпа стратегиллĕ сесси иртнĕ.
Мероприятие туризм организацийĕсен представителĕсем, культурăпа вĕренỹ учрежденийĕсен ертỹçисем, предпринимательсемпе бизнесменсем, патшалăх тата хăйтытăмлăх орга-нĕсен ĕçченĕсем, журналистсемпе блогерсем хутшăннă. Вĕсем хăйсен шухăшĕсемпе, проекчĕсемпе паллаштарнă. Сесси ĕçне ЧР Пуçлăхĕ Михаил Игнатьев та хутшăннă, вăл çĕнĕ проектсемпе савăнсах паллашнă.
- Чăваш Енре туризма аталантарма пĕтĕмпех пур. Юлашки çулсенче пирĕн республикăн сăнĕ улшăнчĕ, инфратытăмĕ тĕрекленчĕ, районсемпе хуласем хăтлăланчĕç. Çапах ыйтусем те çук мар, уйрăмах сервис енĕпе. Пирĕн хăна çурчĕсен пурлăхпа техника никĕсне çĕнетес енĕпе нумай ĕçлемелле. Ют çĕршыврисенчен тĕслĕх илмелле, вĕсенчен вĕренмелли нумай. Туризм енĕпе пысăк опыт пухнăскерсем кашни туристăн кăмăлне тивĕçтерме пултараççĕ. 2019-2020 çулсенчи уявсем тĕлне чăваш çĕрĕ татах илемленĕ, пуянланĕ. Çакна тума бюджетра вун-вун миллиард тенкĕ уйăрса хунă, - тенĕ Михаил Васильевич. Вăл проект авторĕсен шухăшĕсене ырласа йышăнннă, вĕсене пурнăçа кĕртмешкĕн инвесторсем тупмалли пирки асăрхаттарнă.
Источник: "Каçал Ен"