17 января 2017 г.
Январĕн 14-мĕшĕнче Комсомольски вăрманĕнче Олимп чемпионĕ Владимир Воронков ячĕпе йĕлтĕрпе чупакансен ăмăртăвĕ иртрĕ.
Ăмăртăва 200 ытла спортсмен, пĕчĕккисенчен пуçласа ваттисем таранах, хутшăнчĕ. Тĕслĕхрен, чи çамрăк спортсмен - 5-мĕш класра пĕлỹ пухакан Арсентий Архипов, Федор Ефимов вара 80 çултан иртнĕ. Пĕтĕмĕшле пĕлỹ паракан шкулсен командисем хушшинче Анат Тимĕрчкасси тĕп шкулĕн команди мала тухрĕ. Тăманлă Выçли тĕп шкулĕ - иккĕмĕш, Хырхĕррисем виççĕмĕшсем пулчĕç. Асăннă шкулсенче пĕлỹ пухакан хĕрсем те ăмăртура палăрчĕç. Акă, Диана Давыдова (Хирти Явăш тĕп шкулĕ) финиша пĕрремĕш çитрĕ, Яна Осипова (Анат Тимĕрчкасси) - иккĕмĕш, Настя Кузнецова (Хырхĕрри) - виççĕмĕш.
Каччăсенчен Никита Бархонов (Тăманлă Выçли), Ралиф Зейнетдинов (Чĕчкен), Максим Леонтьев (Анат Тимĕрчкасси) чи матуррисем пулчĕç. Вăтам шкулсенче вĕренекен хĕрачасем хушшинче финиша Снежана Кузнецова (Нĕркеç) -пĕрремĕш, Анастасия Чернова (Аслă Чурачăк) - иккĕмĕш, Лидия Прокопьева (Асанкасси) виççĕмĕш çитрĕç. Каччăсенчен Денис Зайцевпа Нияз Шарафутдинов (Аслă Чурачăк) пĕрремĕшпе иккĕмĕш вырăнсене тухрĕç, Алексей Корнилов (Комсомольски) - виççĕмĕш. Командăпа илес пулсассăн Аслă Чурачăксем - чи хăвăрт чупакансем. Нĕркеçсем - иккĕмĕш, Шурутсем - виççĕмĕш.
Хĕрарăмсемпе арçынсем те йĕлтĕр çине тăрса старта тăчĕç. Снежана Аврелькина (Асанкасси) дистанцие чи малтан чупса çитрĕ. Оксана Кошкина (Нĕркеç) - иккĕмĕш, Венера Арсентьева (Тукай) - виççĕмĕш. Арçынсенчен Евгений Васильева çитекенни пулмарĕ. Владимир Николаев - иккĕмĕш, Валерий Матвеев виççĕмĕш пулчĕç.
Ю.БОРОВКОВ.
Источник: "Каçал Ен"