13 января 2017 г.
...Культура çуртĕнче халăх туллиех. Пĕр пушă вырăн та çук. Ура çинче тăракан та чылай. Пурте районти агитбригада концертне курма килнĕ. Акă, сцена çине виçĕ яш тухрĕ - Александр Кубня тата Валерий Митюковпа Тит Титов музыкантсем. Пурте шап-шурă кĕпепе, галстукпа, тĕм хура костюмпа. Хитре те килĕшỹллĕскерсем, пăхса ытараймăн. Хăйсем хайланă такмаксене шăрантарчĕç вĕсем. Теми вара тĕрлĕрен пулчĕ: кахалсен, ĕçкĕ-çикĕпе иртĕхекенсен, ỹрĕк-сỹрĕк ĕçлекенсен ячĕсене каласах питлерĕç, маттурсене мухтарĕç.
Валерий Степанович авкаланса тăракан тĕм хура çỹçне аллипе шăлса илет те баянне малалла тăсать. Халăх вĕсен такмакĕсене тăвăллăн алă çупса йышăнчĕ. Поэчĕ те, композиторĕ те, юрăçи те кунтах. Пур енĕпе те пултаруллă вĕсем. Виççĕн икĕ сехетлĕх концерт пама та пултараççĕ. Çапла вĕсем, Турă панă талантлă çынсем. Ялсене хăйсем çеç тухса çỹремен вĕсем. Кунта ташлакансем те, юрăçсем те пулнă.
Валери амăшĕпе тата амăшĕн аппăшĕпе пĕрле пурăннă. Хăй тăрăшнипе, пултарнипе пурнăç çулне шыраса тупнă. Çамрăклах юрлама, купăс калама юратнă. Комсомольскинчи вăтам шкултан вĕренсе тухсан, республикăри культура училищине çул тытнă. Тăрăшса вĕреннĕ. Ĕç çулĕ çине тăнă. Элпуçĕнчи, Вăрманхĕрри Чурачăкри клубсенче заведующире ĕçленĕ. Çамрăксене культура ĕçне активлă явăçтарнă. Вăл хатĕрленĕ концертсемпе спектакльсем çỹллĕ шайра иртнĕ.
Кайрантарах музыкант районти, Кĕçĕн Каçалти культура çурчĕсенче илемлĕх ертỹçи пулнă. Юратнă ĕçне чун-чĕререн парăннă. Хăй тĕллĕн вĕреннĕ поэт Александр Кубня тата ытти çыравçăсен сăввисемпе юрăсем кĕвĕленĕ - "Прикубнинская сторонка", "Комсомольский вальс"... Баянпа тĕлĕнмелле лайăх каланă, вĕрсе калакан инструментсене те алла илнĕ. Комсомольскинчи вăтам шкулта чылай вăхăт музыка учителĕнче ĕçленĕ.
Çакна та каламалла, Валерий Степанович районти халăх театрĕн ĕçне те активлă хутшăннă, тĕрлĕ спектакльсенче вылянă, рольсене чăн-чăн пурнăçри пек сăнарлама тăрăшнă. Ватăрах çынсем паян та Александр Долгов, Александр Тарасов, Анатолий Счетчиков, Иван Гоголев, Марс Орлов, Валерий Митюков, Тит Титов, Михаил Николаев, Владимир Гурьянов вылянă рольсене асрах тытаççĕ. В.Митюков нумай фестиваль лауреачĕ пулнă.
Пултаруллă музыкант пиртен йывăр чире пула 55 çултах уйрăлса кайрĕ.
З.СОЛОВЬЕВА.
Источник: "Каçал Ен"