26 декабря 2016 г.
Нумаях пулмасть Хирти Шăхасанта Чăваш Республикин физкультурăпа спортăн тава тивĕçлĕ ĕçченĕ Зинон Пантелеймонович Иванов призĕшĕн йĕлтĕрçĕсен хĕллехи спорт сезонĕ уçăлчĕ. З.П.Иванов 1971-1984 çулсенче Кĕçĕн Çĕрпỹел вăтам шкулĕнче физкультура учителĕнче ĕçленĕ, халĕ çемйипе Шупашкар хулинче пурăнать. Ачасене спортпа туслаштарассишĕн нумай тăрăшать. Сахал мар спортсмен вĕрентсе кăларнă. З.П.Ивановăн биографийĕпе Аслă Çĕрпỹел ял администрацийĕн пуçлăхĕ Геннадий Герольдович Ракчеев паллаштарчĕ, вăлах ăмăрту уçăлни çинчен пĕлтерчĕ. Ял администрацийĕ тата Зинон Пантелеймонович ятĕнчен Кĕçĕн Çĕрпỹел вăтам шкулĕн физкультура учительне Раиса Витальевна Сапожниковăна 50 çулхи юбилейпе саламларĕç, Хисеп грамотипе тата парнепе чысларĕç.
Çак ăмăртăва Кĕçĕн Çĕрпỹел вăтам шкулĕнче вĕренекенсемсĕр пуçне Хирти Явăш тата Нĕркеç вăтам шкулĕсен ачисем те хастар хутшăнчĕç. Зинон Пантелеймоновичпа пĕрле ĕçленĕ, тĕрлĕ ăмăртусенче вăй виçнĕ Р.З.Тимергалеев, В.И. Пундяков, А.П.Самаркин, Н.И. Васильев, Н.Н.Ятманов, А.К.Давыдов, Е.В.Зимцов, В.Ф.Пушкин, А.В.Казаков ветеран-спортсменсем те йĕлтĕр çине тăчĕç.
Йĕлтĕр çине тăнисенчен чи асли - Василий Иванович Пундяков, чи çамрăк йĕлтĕрçĕ Егор Тихонов пулчĕ. Мала тухнисене ял администрацийĕ З.П.Иванов ячĕпе кубоксем, медальсем, грамотăсем тата парнесем парса чысларĕ. Ю.Н.Любимов йĕлтĕр-çĕсене уйрăм парнесем пачĕ. Ăмăртăва çỹллĕ шайра ирттерме З.Иванов, Г.Ракчеев, Р.Сапожникова, В.Автономов, Е.Зимцов, А.Иванов, Л.Иванова,С.Соколов, Ю.Любимов, С. Антонова, Е.Казакова судьясем пулăшрĕç.
Ăмăртăва килнисене, хăнасене тата куракансене Елена Лисина, Галинăпа Леонид Лукияновсем, Валентина Андреева, Надежда Акчурина, Елена Афанасьева, Эльвира Быкова, Юлия Андреева пулă шỹрпипе тата вĕри чейпе хăналарĕç.
Канмалли кун пуриншĕн те чăн-чăн уяв пулчĕ. Малашне çак ăмăртăва кашни çулах ирттерессине йăлана кĕртме палăртса хăварчĕç йĕлтĕрçĕсем.
Аслă Çĕрпỹел ял администрацийĕ ăмăртăва ирттерме пулăшнăшăн Кларăпа Зинон Ивановсене, Ю.Н.Любимова, С.В.Соколова, С.В.Михайлова, Р.В.Сапожниковăна, вăтам шкул дирекцине тата Хирти Шăхасан ял çыннисене тав тăвать.
Г.РАКЧЕЕВ.
Источник: "Каçал Ен"