23 декабря 2016 г.
Кино çулталăкĕ çав тери тухăçлă та кăсăклă иртни куçкĕрет. Кăçал республикăра пурăнакансене кинопа татах та çывăхлатас тесе курăмлă ĕçсем пурнăçларĕç. Чăваш Енри хуласемпе районсенче кино залĕсем уçăлни - пысăк пулăм. Çак кунсенче вара района та ырă хыпар çитрĕ. Урмаел культура çурчĕ РФ Кино фончĕ йĕркеленĕ конкурса хутшăнса çĕнтерỹçĕсен йышне кĕнĕ. Палăртса хăвармалла, асăннă конкурса Раççейри 424 культура организацийĕ хутшăннă, вĕсенчен 139-шне кинозалсем тума субсиди уйăрма йышăннă. Çак йышра Чăваш Енри культура учрежденийĕсем те пур. Патăрьел, Куславкка, Комсомольски, Етĕрне, Тăвай районĕсенче, Çĕнĕ Шупашкар хулинче çĕнĕ йышши кинозалсем пулĕç. Урмаелти культура çуртĕнче кинозал тума 5 миллион тенке яхăн укçа уйăраççĕ. Апла пулсассăн çитес вăхăтра пурте пĕрле кино курса савăнăпăр.
Рахиля Абзалтдиновна ХАСАНОВА,
Урмаел культура çурчĕн директорĕ:
- Раççей шайĕнче йĕркеленĕ конкурсра çĕнтернине пĕлсессĕн чăннипех те, коллективпах савăнтăмăр. Çакă пирĕншĕн калама çук пысăк çитĕнỹ. Ялта пурăнакансемшĕн пушшех те пулĕ тетĕп. Тĕслĕхрен, паянхи кун кино курас тесессĕн хулана çитмелле. Малашне вара пушă вăхăтра ялтах кино курма май пулĕ. Район çыннисем пирĕн çитĕнĕве кирлипех хакласса шанатпăр.
Источник: "Каçал Ен"