16 декабря 2016 г.
Чăваш Республикинчи Хĕрарăмсен советне çак кунсенче савăнăçлă хыпар килнĕ. Хĕрарăмсен совечĕ йĕркеленĕ "Сохранение и передача национальных и культурных традиций: от матери к дочери" куçса çỹрекен выставка" проект гранта тивĕçнине пĕлтернĕ. Асăннă проекта валли Раççей Федерацийĕн Президенчĕн 2016 çулхи апрелĕн 5-мĕшĕнчи 68-рп №лĕ хушăвĕпе килĕшỹллĕн патшалăх пулăшăвĕн бюджетĕнчен укçа куçарса парĕç.
Çак проекта пурнăçа кĕртни Хĕрарăмсен совечĕ юлашки виçĕ çулта йĕркеленĕ курава тăвас ĕçе малалла та тăсма май парать. Куравăн экспозицийĕ республикăра иртекен кашни мероприятирех хутшăннă тесен те йăнăш пулмĕ. Кăçалхи январь уйăхĕнче Раççейри Обществăлла палатăра Чăваш Республикине презентациленĕ вăхăтра та экспонатсене ырласа йышăннă.
Çавăнпа пĕрлех çак проект Союз йĕркеленĕ "Чувашия - сила единства народов и культур" тата "Семья - главное в жизни каждого человека" грантлă ытти проектсене хăйĕн ытамне явăçтарма май парĕ. Куçса çỹрекен выставка вара халăх йăли-йĕркисене çĕнĕрĕн чĕртсе тăратма, Чăваш Республикин территорийĕнче пурăнакан халăхсен культурине сыхласа хăварма пулăшĕ. Экспонатсем хушшинче куравра хĕрарăмсен темиçе ăрăвĕ хатĕрленĕ алĕç хатĕрĕсем пулĕç, хĕрарăм ăстасем мастер-классем ирттерĕç. Проекта çавăн пекех халăх юррисемпе паллаштаракан академиллĕ "Классика" капелла та хутшăнать.
Проекта 2017 çулта хĕрарăмсен Чăваш Енри юхăмĕ 90 çул тултарас умĕн пурнăçа кĕртесшĕн.
Источник: "Каçал Ен"