16 декабря 2016 г.
Районти хисеплĕ çынсенчен пĕри, çулла çуран çỹресе, хĕлле йĕлтĕр сырса сывлăхне çирĕплетекен Ревокат Прохорович Моисеев пĕррехинче çапла каларĕ:
"Спорт кашни çын пурнăçĕнче тĕп вырăн йышăнмалла, вăл ỹт-пĕве пиçĕхтерет, çынна чăтăмлă та вăйлă тăвать. Унсăр пуçне спортпа туслашни кăмăл-туйăма та çĕклет. Ирсерен зарядка туни, çуран утни, кăмăла каякан спорт тĕсĕпе кăсăкланни пурнăçа вăрăмлатать. Ваттисен те, çамрăксен те сывă пурнăç йĕркине пăхăнса пурăнмалла".
Вăл калани çумне урăх нимĕн те хушаймăн. Районта, республикăра, çĕршывра пурăнакансен сывлăхне çирĕплетес тесе нумай ĕç пурнăçлаççĕ. Юлашки çулсенче район центрĕсенче физкультурăпа спорт комплексĕсем хута кайрĕç, шкулсенчи спортзалсене юсарĕç, хĕллехи катоксем ĕçлеççĕ. Районта пурăнакансенчен чылайăшĕ вара юр ларсассăнах йĕлтĕр сырса вăрмана çỹреме кăмăллать. Шкул ачисем, вĕрентекенсем, аслăрах çулхисем хушшинче иртекен ăмăртусене те вăрман хĕрринче йĕркелеççĕ. Сăмахран, кăçал февраль уйăхĕнче районти "Пĕтĕм Раççейри йĕлтĕр йĕрĕ - 2016" спорт ăмăртăвне Чăваш Республикин Пуçлăхĕ Михаил Игнатьев хутшăннăччĕ. Вăл ун чухне çапла каларĕ:
- Трасса мĕнле пулнине пĕлес тесессĕн кашнин йĕлтĕр çине тăрса ярăнса пăхмалла. Виçĕ çаврăм тунă хыççăн çапла калатăп: кун пек йĕлтĕр йĕрĕ пĕтĕм районта пур тесе калаймăн.
Йĕлтĕрпе ярăнма юратакансем те ун чухне трассăна чăннипех лайăх хатĕрленине палăртрĕç. Мĕн юр кайичченех ярăнса килентĕмĕр унта. Çĕнĕ сезонра та çаплах пултăр тесе трасса тăвас ĕçе юр ларичченех пуçăннă. Чи малтанах йывăçсене каснă, çула хăрăк туратсенчен тасатнă. Халĕ вара пурте тăрăшнипе йĕлтĕр йĕрне таптаса хытарнă, тирпейленĕ.
Паянхи куна йĕлтĕр йĕрне ăмăрту йĕркелесе хута яман-ха. Апла пулин те спортпа туслисем кунта кунĕпех ярăнаççĕ. Декабрĕн 17-мĕшĕнче вара ăмăртăва хутшăнакансем йĕлтĕр трасси мĕнле пулнине каласа парĕç. Район администрацийĕн пуçлăхĕ Алексей Самаркин пĕлтернĕ тăрăх, вăрманта кăнтăрла çеç мар, каçхине те ярăнма май пулĕ.
Ĕç-пуçпа вырăна çитсе паллашрăм. Пĕр километрлă трасса "Резерв" ООО çывăхĕнчи пĕчĕк вăрман тавра вырнаçнă. Трассăна çутатма юпасем лартса хатĕрленĕ, электропралук тăсмалли çеç юлнă. Ĕç-пуçпа мана Р.З.Тимергалеев тĕплĕн паллаштарчĕ.
- Район администрацийĕн пуçлăхĕ Алексей Александрович вăрманта йĕлтĕрпе ярăнма трасса тăвас ĕçе пуçарни чăннипех те ырă пулăм. Тỹрех куç умне иртнĕ вăхăт тухать. 1976 çулта Каçал вăрманĕнче пĕрремĕш хутчен каçхине йĕлтĕрпе ярăнмалли йĕр тунăччĕ. Пысăк йĕлтĕр бази пурччĕ, мĕн чухлĕ маттур спортсмен çитĕнчĕ. Пĕр 10 çул аван ĕçлерĕмĕр, кайран тĕрлĕ лару-тăрăва пула пăчлантăмăр, - каласа парать спорт ветеранĕ.
Çав вăхăтри трассăна шăпах Рафик Зиганшович пуçарнипе хута янă. Вăл каланă тăрăх, пысăк ĕçе пĕччен пурнăçламан. Юпасем лартса çутă тăвас ĕçре шăллĕ Рашид тата Комсомольски район çыннисем нумай пулăшу кỹнĕ.
Кăçал вара каçхине йĕлтĕрпе ярăнма май туса пани район çыннисемшĕн чăннипех те ырă пулăм тесе шутлатăп. Çакăнпа ветеран та питĕ кăмăллă. Рафик Зиганшович паянхи куна трасса хатĕрлес ĕçре чи матуррисенчен пĕри. Вăл ыттисене те пĕрле явăçтарать.
Йĕлтĕрпе ярăнса киленме шăпах çакăн йышши трасса кирлипе вулакансем манпа килĕшеççех пулĕ тетĕп. Эпир сирĕн шухăшăрсене кĕтетпĕр. Эсир унта ярăнса курнă-и, йĕлтĕр йĕрĕ кăмăла каять-и? Çырса е шăнкăравласа пĕлтерĕр.
А.ЕФРЕМОВА.
Источник: "Каçал Ен"