13 декабря 2016 г.
Раштавăн 9-мĕшĕнче Раççейре Тăван çĕршыва паттăррăн хỹтĕлекенсен кунне палăртнă.
Çĕнĕ Мăрат шкулĕнче Раççей паттăрĕсене, вăрçăра пуç хунисене чысласа волейбол турнирĕ иртрĕ. Тупăшу пуçланас умĕн шкул ачисемпе вĕрентекенсем линейкăна пухăнчĕç. Шкул директорĕ А.С.Борисов спортсменсене ăнăçу сунчĕ. Тăван çĕршыва хỹтĕлесе хăйсен пурнăçне шеллемен паттăрсене аса илчĕ вăл. Паянхи кун мирлĕ пурнăçпа савăнмаллине, мĕн пуррине, туслăх-тăванлăха упрамаллине каласа хăварчĕ.
Шкул каччисем - çамрăк гвардеецсемпе активистсем - ялти палăк умне асăнса чечек кăшăлĕ хучĕç. Çĕкленỹллĕ марш кĕввипе кĕçĕн классенчи ачасем ташлама тухсан пурте хăпартланчĕç.
Турнирта 4 ушкăн вăй виçрĕ - хĕрсен тата каччăсен ушкăнĕсем, вĕрентекенсемпе ачасен ашшĕ-амăшĕсем. Тупăшура чи вăйлисем каччăсем пулчĕç. Иккĕмĕш вырăна хĕрсен ушкăнĕ çĕнсе илчĕ. Вĕрентекенсем те ачасенчен кая юлмарĕç - 3-мĕш вырăна тивĕçрĕç.
Турнир вĕçленсен шкул директорĕ пурне те хастар пулнишĕн тав турĕ, парнесемпе тата Хисеп грамотисемпе хавхалантарчĕ.
В.ПАВЛОВ.
Источник: "Каçал Ен"