13 декабря 2016 г.
Пирĕн районта çуралса ỹснĕ 260 çыннăн çар служби демократиллĕ Афганистан республикинче иртнĕ. Унтанпа нумай шыв-шур юхса кайрĕ, пирĕн çарсене афган çĕрĕ çинчен кăларнăранпа 27 çул иртрĕ пулин те, воин-интернационалистсен чунĕнче тарăн йĕр хăварнă çав вăхăт нихăçан та манăçмасть. Афган вăрçи вĕсемшĕн пурнăç шкулĕ пулнă-çке. Афганистанра пулнисене халалласа нумаях пулмасть "По приказу Родины - по зову долга: воины-интернационалисты Комсомольского района" кĕнеке кун çути курчĕ. Ăна Анатолий Агафоновпа Вениамин Васильев таврапĕлỹçĕсем пухса хатĕрленĕ.
Декабрĕн 10-мĕшĕнче вара районти тĕп библиотекăра çав кăларăмăн презентацийĕ пулчĕ. Валентина Боровковăпа Елена Хораськина кĕнеке содержанийĕпе паллаштарчĕç. Унта истори справкисем, 400 сăнỹкерчĕк, 260 биографи, интернационалист-воинсен асаилĕвĕсем кĕнĕ. Анатолий Герасимовичпа Вениамин Семенович та кĕнеке епле çуралнине, калăпланнине тĕплĕн каласа пачĕç. Афган ветеранĕсен районти совечĕн председателĕ Виктор Гаврилов, Владимир Назаров интернационалист, район администрацийĕн пуçлăхĕн çумĕ Надежда Петрова, тĕп библиотека директорĕ Инна Ядрова, çар комиссариачĕн специалисчĕ Герольд Серебров кĕнеке тухни пысăк пулăм, вăл ют вăрçа хутшăннă паттăр ентешсем çинчен аса илтерсе тăракан палăк пулнине палăртрĕç. Унсăр пуçне, çамрăксене патриотизмла воспитани парас ĕçре те пулăшу кỹрĕ вăл.
Анатолий Турханов вара вăл вăхăтра военкомра ĕçленĕ, каччăсене вăрçа ăсатнă, кĕтсе илнĕ. Вăл кăна та мар, хăшне-пĕрне кĕренме кĕме те направлени панă. Питĕ шел, пиллĕкĕшне - Игорь Гаврилова, Владимир Крылова, Фазых Тазетдинова, Виктор Тумакова, Сергей Шмелева - цинк тупăксенче илсе килнĕ. Вĕсене асăнса пĕр минут шăп тăчĕç.
Авторсем тĕлпулăва пуçтарăннă афган вăрçин ветеранĕсене (вĕсем вăтăр саккăрăнччĕ) кашнинех кĕнеке парнелерĕç. Çавăн пекех ку кăларăм районти ял, шкул библиотекисен çỹлĕкĕсем çинче те вырăн тупĕ.
Мероприятие хутшăннисене Георгий Печниковпа Виктор Гаврилов гитарăпа выляса юрăсем юрласа пачĕç.
Л.ШУРЯШКИНА
Источник: "Каçал Ен"