13 декабря 2016 г.
Республикăра пурăнакансем юртан тасатса тăман урамсем пирки "Народный контроль" порталта шалăп пама пултараççĕ.
Сивĕ кунсем пуçланнă май ĕç тăвакан влаç, вырăнти хăйтытăмлăх органĕсем, ертсе пыракан организацисем тата коммуналлă службăсем çине инфратытăм кирлĕ пек ĕçлетĕр тесе хушма тиев хушăнать. Анчах та чылай чухне граждансем вĕсен ĕçĕпе кăмăллă юлмаççĕ: тротуарсемпе çулсене, çуртсен çивиттисене пăртан тата юртан тивĕçлĕ тасатмаççĕ, хваттерсене ăшă шывпа тата ăшăпа туллин тивĕçтермеççĕ. Кун пек лару-тăрура республикăра пурăнакансем влаç органĕсене пулăшма пултараççĕ. Çитменлĕхсем пур пулсан çакăн пирки "Халăх тĕрĕслевĕ" порталпа усă курса пĕлтермелле. Йывăрлăх пирки туллин пĕлтерес тесен çитменлĕхсем ăçта пулнине кăтартмалла, ỹкерсе илмелле. Шалăп панă хыççăн 10 ĕç кунĕ хушшинче ĕç тăвакан влаç тата вырăнти хăйтытăмлăх органĕсенчен хурав килет. Аса илтеретпĕр, асăннă портал шалăпсене, ыйтусене 2015 çулхи январь уйăхĕнчен йышăнать. Вăл ĕçлеме пуçланăранпа информаци ресурсĕ 1 пин ыйтăва пăхса тухнă, вĕсенчен çичĕ проценчĕ - çулсене тата çурт çумĕнчи территорисене пăртан, юртан тивĕçлĕ тасатса тăманни пирки. Ытти сферăсенче - медицина, вĕрентỹ, çыхăну, çурт-йĕрпе коммуналлă хуçалăх, ял хуçалăх, бизнес, обществăлла транспорт ĕçĕ тата ытти те - ыйтусем тухсан та çак порталпа усă курмалла.
Источник: "Каçал Ен"