09 декабря 2016 г.
Декабрĕн 7-мĕшĕнче Шупашкарта регионсем хушшинчи "IT-Link" форум иртнĕ.
Форумăн тĕп теми - патшалăхпа бизнес хушшинчи информаци технологийĕсен ĕçтешлĕхĕ, çĕнĕ экономика условийĕсенче эффективлă IT-йышăнусене ĕçе кĕртесси.
Пухăннисене Чăваш Республикин информаци политикин тата массăллă коммуникацисен министрĕ Александр Иванов саламланă. Вăл Раççей Президенчĕ хăйĕн çулленхи Çырăвĕнче те информаци технологийĕсен отрасльне, пысăк технологиллĕ бизнеса аталантарма пысăк тимлĕх уйăрма каланине палăртса хăварнă. Çавăн пекех министр "IT-Link" форумăн пĕлтерĕшĕпе унта хутшăнакансен йышĕ ỹснине те уйрăммăн асăннă.
- Форума çĕршывăн тĕрлĕ регионĕсенчен килсе çитни чăннипех те савăнтарать. Бизнеспа влаç пĕрлехи командăра ĕçлеççĕ, пĕр тĕллевсемпе утаççĕ - çынсен пурнăçне çăмăллатасси, сервиссемпе, пулăшусемпе усă курма меллĕрех тăвасси. Юлашки çулта çеç республика пысăк утăм турĕ. Çулталăк пуçламăшĕнче регионта "Чăваш Республикинчи информаци технологийĕсем" ассоциаци туса хучĕç, нумаях пулмасть вара информаци технологийĕсен центрĕ ĕçлеме пуçларĕ. Пĕлетĕп, пĕрлехи вăйпа эпир ИТ-индустрие аталантарма тата "айтишник" профессине сарма пултаратпăр, - тенĕ Александр Степанович.
Информаци технологийĕсен центрĕн уйрăм начальникĕ Михаил Степанов Чăваш Енре хута яма палăртнă "Контингент" патшалăхăн регионти сегменчĕн информаци системипе паллаштарнă. Аса илтеретпĕр, проекта ĕçе кĕртме республикăна 5 млн та 460 пин тенкĕ субсиди уйăрнă.
Пĕтĕмĕшле илсен асăннă тытăмра ачасем пирки пур информаци те упранать. Системăна хальлĕхе тестировани витĕр кăларнă, проекта çулталăк вĕçне ĕçе кĕртмелле.
Источник: "Каçал Ен"