09 декабря 2016 г.
Ача - çемье илемĕ. Вăл сывă, ăслă-тăнлă, çынлăха туйса ỹссен аслисем савăнаççĕ. Ытларах чухне ачана воспитани тата пĕлỹ парас ĕçре ашшĕ-амăшне шкул пулăшать.
Нумаях пулмасть Шурут вăтам шкулĕнче ашшĕ-амăшĕн пухăвĕ пулчĕ. Н.И.Андреев директор шкул системинчи çĕнĕлĕхсем, кулленхи ĕç-хĕл, апатлану тата шалти туалет тăвас ĕç мĕнле пыни пирки каласа кăтартрĕ, ашшĕ-амăшне хумхантаракан чылай ыйту çине хуравларĕ.
Вĕренỹ ĕçĕнчи çитĕнỹсемпе директор çумĕ Г.С.Симакова паллаштарчĕ, лайăх паллăсемпе вĕренекен ачасене палăртса хăварчĕ. Унсăр пуçне ача киле панă ĕçсене пурнăçланин пысăк пĕлтерĕшĕ пирки аса илтерчĕ. Сăмахран, кĕçĕн класра вĕренекенĕн 1,5-2 сехетрен, вăтам класс вĕренекенĕн 2-2,5 сехетрен, аслă класри ачан 3-3,5 сехетрен кая мар килти ĕçсемпе лармалла. Ашшĕ-амăшĕн вĕсем çак йĕркене пăхăннине тĕрĕслесе тăмалла, пушă вăхăта усăллă ирттерччĕр тесе тăрăшмалла.
Шкул психологĕ Л.Г.Пыркина Раççейре наркомани чирĕ анлă сарăлса пыни, унăн сиенĕ çинчен пĕлтерчĕ. Ачапа çывăх тус пулма, ăна юратма, ăнланма тата вăл ылмашнине вăхăтра асăрхаса тăма ыйтрĕ. Наркомани чирĕ ачасем хушшинче ан сарăлтăр тесе кĕрешес ĕçре ашшĕ-амăшĕн тỹпи те пысăккине каласа хăварчĕ.
Пухăва малалла концерт тăсрĕ. Ачасем хаваслă сăвă-юрăсемпе, илемлĕ ташăсемпе, кĕске сценкăсемпе савăнтарчĕç. Çавăн пекех ашшĕ-амăшсене Шурут культура çурчĕ çумĕнчи "Шăхаль" эстрада ушкăнĕ те саламларĕ.
Луиза Носковăн шкул фойинче йĕркеленĕ ал ĕçĕсен выставки тата ачасен ашшĕ-амăшĕсен сăнỹкерчĕксен пуххи уява илем кỹчĕç.
Г.СИМАКОВА,
Шурут вăтам шкулĕ.
Источник: "Каçал Ен"