09 декабря 2016 г.
Декабрĕн 5-мĕшĕнче Чăваш Ен Пуçлăхĕ Михаил Игнатьев сыснасен Африка мурĕ пирки оперативлă канашлу ирттернĕ. Сăлтавĕ - декабрĕн 2-мĕшĕнче "Присурский" заповедник çывăхĕнче пилĕк хир сыснин виллине тупни. Лабораторинчи анализсем чĕрчунсем Африка мурне пула вилнине çирĕплетсе панă. ЧР Çутçанталăк ресурсĕсен тата экологи министерстви палăртнă тăрăх, Улатăр, Пăрачкав районĕсенчи хăш-пĕр ялсене çирĕп асăрхава илме йышăннă, çынсене вăрмана çỹреме чарнă. Выльăх-чĕрлĕхе те тĕрĕслевсĕр вырăнтан вырăна куçарма юраманни пирки пĕлтернĕ. "Хальхи вăхăтра сыснасен чирĕпе кĕрешме, вăл ан сарăлтăр тесе ятарлă ушкăн ĕçлет. Республикăра ветеринари служби кирлĕ мерăсем йышăннă. Кăлтăка вăхăтра сирсе яма майсем çителĕклĕ", - тенĕ ЧР çутçанталăк ресурсĕсен тата экологи министрĕ Александр Коршунов. Сыснасен Африка мурĕпе çыхăннă лару-тăрăва Чăваш Ен Пуçлăхĕ Михаил Игнатьев çирĕп тĕрĕслевре тытнине палăртнă.
Чăваш Енри ветеринари служби çынсене пурне те асăрхануллă пулма ыйтать, инкек сиксе тухсан "хĕрỹ линин" 8(8352) 64-20-83 номерĕпе шăнкăравласа пĕлтерме сĕнет.
Источник: "Каçал Ен"