09 декабря 2016 г.
Кăçал Раççейре Кино çулталăкĕ пулчĕ. Çак вăхăтра Чăваш Енре те Кино çулталăкĕ ячĕпе нумай мероприяти иртрĕ, проектсем пурнăçланчĕç. Регионта кинофестивальсем, семинарсем, акцисем, театр тата кино артисчĕсемпе тĕл пулусем пулчĕç. Тĕслĕхрен, май уйăхĕнче Шупашкарта Пĕтĕм халăхсен IX кинофестивалĕ иртнĕ хыççăн, Раççей халăх артисчĕ Александр Пятков Чăваш Енĕн лайăх киносем ỹкерме хăватлă никĕс пуррине палăртса хăварнă. Апла пулин те чи хаклă хаклав - Раççей культура министрĕн Владимир Мединскин. Вăл республика Пуçлăхне Михаил Игнатьева Пĕтĕм Раççейри "Кино каçĕ" акцие хутшăннăшăн, ăна çỹллĕ шайра йĕркелесе ирттернĕшĕн тав тунă.
Кино çулталăкĕнче Чăваш Енри хуласемпе районсенче кино залĕсем уçăлни те - пысăк пулăм. Улатăр, Канаш, Çĕмĕрле тăрăхĕнче пурăнакансем Раççей тата тĕнче индустрийĕн çĕнĕлĕхĕсене курса киленеççĕ. Декабрь уйăхĕн иккĕмĕш çурринче - Çĕрпỹ тата Сĕнтĕрвăрри районĕсенче, 2017 çулхи пĕрремĕш кварталта Вăрнарта çĕнĕ йышши кинозалсем уçăлĕç.
Палăртнă ĕçсене маттур та ĕçчен çынсемсĕр пурнăçлама май çук. Шăпах вĕсем проектсене ĕçĕ кĕртес тесе тимленĕ, тимлеççĕ те. Ахальтен мар 2016 çула Чăваш Енре Ĕç çыннин çулталăкне халалланă. "Ĕçчен çын ĕмĕр мухтавра", - тенĕ мĕн ĕлĕкех.
Декабрĕн 13-мĕшĕнче Шупашкар хулинче Пăр керменĕнче Кино тата Ĕç çыннин çулталăкне савăнăçлă лару-тăрура пĕтĕмлетеççĕ, Раççейри Экологи, Чăваш Енри Амăшĕн тата ашшĕн çулталăкне уçаççĕ. Уяв 14 сехетре пуçланать.
Источник: "Каçал Ен"