09 декабря 2016 г.
Пирĕн республикăри влаç халăхпа куçа-куçăн тĕл пулса уççăн калаçма яланах хатĕр. Çакна граждансемпе тĕл пулма йĕркелекен йышăну кунĕсем те туллин çирĕплетеççĕ. Акă, юнкун та, декабрĕн 7-мĕшĕнче, Раççей Федерацийĕн Президенчĕн республикăри Йышăну пỹлĕмĕн планĕпе килĕшỹллĕн, район администрацийĕнче йышăну кунĕ иртрĕ. Унăн тĕллевĕ те витĕмлĕ - граждансене тивĕçлĕ пулăшу парасси, вĕсене хумхантаракан ыйтусене уçăмлатасси.
Районта пурăнакансене çав кун Чăваш Республикин Тĕп Федераци инспекторĕ Геннадий Федоров йышăнчĕ. Çавăнпа пĕрлех йышăну кунне РФ Социаллă страховани фончĕн Чăваш Республикинчи регионти уйрăмĕн управляющийĕ Галина Николаева, Росреестрăн республикăри управленийĕн ертỹçи Екатерина Карпеева, вĕрентỹ тата çутçанталăк ресурсĕсемпе экологи министрĕсен çумĕсем Надежда Дмитриевăпа Татьяна Иванова, Транспортпа çул-йĕр хуçалăхĕн министерствин представителĕ Роман Краснов, район администрацийĕн пуçлăхĕ Алексей Самаркин тата район прокурорĕн çумĕ Сергей Валерьянов хутшăнчĕç.
Районта пурăнакансем йышăну кунĕнче хастар пулчĕç, хăйсен ыйтăвĕсене пуçлăхсем патне çитерме паракан майпа усă курчĕç. Çав кун пуçтарăннисем 13 ыйтăва тĕплĕн пăхса тухрĕç. Çынсене ытларах харпăр хăйне пырса тивекен ыйтусем пăшăрхантараççĕ, строительство, ĕçе вырнаçасси тата социаллă пулăшу парасси, çĕнĕ çулсем тăвасси - граждансем çак тата ытти ыйтупа килнĕ. Акă, тĕслĕхрен, Киров поселокĕнче пурăнакансене Завод урамĕнче çĕнĕ çул тăвасси пăшăрхантарать. 2-мĕш ушкăн инваличĕн В.М.Шакаевăн мăшăрĕ вара упăшкине транспортпа тивĕçтерессипе пулăшу шырама килнĕ. А.С. Зайцев, 80 çул урлă каçнăскер, пенсине çĕнĕрен шутлассинче тĕрĕслĕх кĕтет. П.В.Зайцева кредит парăмне мĕнлерех татса пама пулни кăсăклантарать.
Харпăр хăйсен ыйтăвĕсемсĕр пуçне çынсем обществăри проблемăсене татса пама та ыйтса пынă. Петр Баринов, акă, Кĕтне Пасар ялĕ çывăхĕнчи карьера хупас ыйтăва çĕклерĕ. Мария Илларионова Урмаел ялĕнче ача сачĕ тăвас ыйтупа пычĕ. Комисси ку ыйтупа Урмаелти вăтам шкул çумĕнче шкул умĕнхи икĕ ушкăн уçма май пулнине пĕлтерчĕ. Александр Степанов автовокзал вырăнне куçарасси, вăрмансемпе шурлăхсенчи хыт каяшсене утилизаци тăвасси пирки сăмах хускатрĕ. Хирти Мăрат ялĕнче пурăнакансене вара шкул автобусĕпе тивĕçтерменни пăшăрхантарать. Ялта пурăнакан 5 шкул ачи райцентрта вырнаçнă шкулсене куллен укçа тỹлесе çỹрет. Ку ыйтăва Комсомольски районĕн депутачĕсен Пухăвĕн çитес ларăвĕнче çĕклесе сỹтсе явĕç.
Пулăшу шыраса килнисен ыйтăвĕсене тĕплĕн сỹтсе явнă, мĕн тумаллине ăнлантарса панă. Йышăннă кашни заявленипе конкретлă порученисем панă, вĕсене вăраха ямасăр татса пама шантарнă. Çакăн евĕр тĕлпулусем ирттернин витĕмĕ, паллах, пысăк, мĕншĕн тесен çакă халăха тивĕçлĕ пулăшу пама май парать.
Декабрĕн 12-мĕшĕнче те, Раççей Федерацийĕн Конституци кунĕнче, Пĕтĕм Раççейри йышăну кунĕ иртет. Асăннă мероприяти, 4-мĕш çул ĕнтĕ, Раççей Президенчĕн Владимир Путинăн хушăвĕпе иртет. Кашни çулах 12 сехетрен пуçласа 20 сехетчен халăх пĕтĕм влаç органĕсене кăсăклантаракан ыйтусемпе пыма пултарать. Районта пурăнакансем вара администраци компетенцине кĕрекен ыйтусемпе район администрацине, Комсомольски ялĕ, Завод урамĕ, 57-мĕш çурт, 3-мĕш хут, 44-мĕш кабинет адреспа пыма пултараççĕ. Хăвăрпа пĕрле паспорт илме ан манăр. Йышăнăва килес текенсен маларах 5-12-05 телефонпа шăнкăравласа е komsml@cap.ru электронлă почтăпа çырăнмалла. Енчен те гражданина кăсăклантаракан ыйтăва район администрацийĕ татса параймасть пулсан, унăн ыйтăвне профиллĕ ведомствăна аудио е видео майпа ярса парĕç.
Н.АРХИПОВА.
Источник: "Каçал Ен"